DILI, STLTIMORLESTE.com – Timor Leste (TL) lakon tan matenek no lutadór, eis Padre Martinho Gusmão, ne’ebé fó kontribuisaun ba luta libertasaun nasional.
Tuir Visi Primeiru Ministru (VPM), Ministru Koordenadór ba Asuntu Sosial no Ministru Dezenvolvimentu Rural no Abitasaun Komunitária, Mariano Assanami Sabino, hato’o kondolénsia ba família eis Padre Martinho Gusmão, ne’ebé konsidera nu’udar intelektual no lutadór Timor oan ne’ebé fó kontribuisaun importante durante luta libertasaun nasional, bainhira hato’o mensajen kondolénsia ne’e iha Salaun Auditorium Ministériu Finansas, Aitarak, Dili, ba Jornalista sira, Tersa (25/08/2026).
Nia hateten, mate eis Padre Martinho Gusmão signifika Timor-Leste lakon ema matenek ida ne’ebé iha papél importante iha períodu Resisténsia no iha prosesu harii nasaun depois ukun-rasik-a’an.
“Lori Governu Timor-Leste nia naran, hau hato’o sentidu kondolénsia ba família eis Padre Martinho Gusmão. Nasaun no povu Timor-Leste lakon ema ida ne’ebé importante tebes,” dehan Mariano.
Tuir VPM, Martinho Gusmão iha envolvimentu maka’as iha luta Resisténsia no nu’udar intelektual, nia kontribui ba dezenvolvimentu hanoin no konsiénsia polítika Timor-oan sira.
Martinho Gusmão mos uluk sai lider no membru importante iha RENETIL durante períodu Resisténsia. Nia kontribuisaun la’ós de’it liuhusi atividade polítika, maibé mos liuhusi eskrita no atividade intelektual.
Mariano hateten, Martinho Gusmão hakerek livru kona-ba Teolojia Lorosa’e, ne’ebé mos aborda situasaun Timor-Leste no luta ba ukun-rasik-a’an.
Durante nia estudu arquitetura iha Alemanha, Martinho Gusmão mos kontinua acompanha no hato’o preocupasaun kona-ba situasaun Timor-Leste. Nia dala barak hakerek karta ba Prezidente Indonézia, B.J. Habibie, kona-ba situasaun feto-faluk no oan kiak Timor-oan sira, liuliu iha períodu depois Referendu 1999.
Mariano mos apela ba Estadu atu kontinua fó rekoñesimentu ba membru no lutadór RENETIL sira ne’ebé fó sira nia kontribuisaun ba luta libertasaun nasional, inklui sira ne’ebé seidauk hetan rekoñesimentu ofisiál.
Nia hateten, maski rekoñesimentu ne’e la signifika diretamente benefísiu osan, maibé importante atu Estadu rekonhese sira nia servisu no kontribuisaun ba nasaun.
Iha sorin seluk, Primeiru-Ministru Kay Rala Xanana Gusmão, liuhusi pájina ofisiál, mos hato’o kondolénsia ba família eis Padre Martinho Gusmão, ne’ebé hakotu iis iha Hospital Nasional Guido Valadares (HNGV), Dili, Domingu (23/08/2026).
Eis Padre Martinho Gusmão sei hetan serimónia funebre iha Baucau. Ministru Komérsiu no Indústria, Filipus Nino Pereira, reprezenta Estadu hodi hato’o mensajen kondolénsia husi Governu ba família.
Serimónia misa funebre sei prezide husi Bispu Baucau, Dom Leandro Maria Alves, iha Igreja Katedral Baucau.
(jos)
