DILI, STLTIMORLESTE.com – Tribunal Judisial Primeira Instansia Dili liu husi leitura sentensa kondena arguidu ho inisial VSAO hanesan lezada inisial GRB nia eis namoradu, ho pena multa.
Iha sala julgamentu laran loron Segunda, Juiz Prosesu Ivan Suritai deklara katak, ba prosesu nee Ministeriu Publiku akuza arguidu ho krimi rua, Ameasa no Violensia Domestika ho Forma Ofensa Integridade Fizika Simples.
Tribunal haree katak, krimi Ameasa la prienxe, tanba lezada deklara arguidu ameasa lezada, maibe lezada la sente tauk no lao livre, hahu husi problema too mai agora lezada lao livre. Tanba nee, Tribunal konsidera ba krimi Ameasa la prienxe hodi Tribunal deside absolve arguidu husi krimi Ameasa.
Ba krimi Violensia Domestika ho Forma Ofensa Integridade Fizika Simples, Tribunal konsidera prienxe tanba momentu neeba arguidu halo duni agresaun, tuir arguidu nia konfesaun, reforsa tan ho lezada nia deklarasaun.
Ba krimi refere Tribunal la iha duvidas hodi konsidera provadu. Tanba nee ikus mai Tribunal deside aplika pena multa US$ 200 ba arguidu. Tribunal mos esplika arguidu la kumpri multa, arguidu sei tama iha prizaun alternativu durante loron 66. No husu atu arguidu la konkorda bele liu husi nia defeza halo rekursu.
Antes nee iha alegasaun Prokurador Domingos Barreto husu ba iha Tribunal atu konsidera deklarasaun lezada nian, hodi aplika desizaun ba arguidu.
Enkuantu husi parte Defeza Manuel Exposto husu Tribunal aplika pena neebe kmaan ba arguidu.
Tuir akuzasaun katak, iha loron 2 fulan Julhu tinan 2022 iha Metiaut Dili, arguidu lori liman buti lezada nia kakorok, hodi dudu lezada tama ba karreta laran.
Tama iha karreta laran arguidu lori liman tuku dala barak iha lezada nia kakorok no ibun, no ameasa lezada katak kuandu o baku hau nia doben hau sei baku o liu fali ida nee.
Husi agresaun neebe arguidu halo ba lezada iha karreta laran, lezada mos sofre nia korenti talin kotu hodi korenti monu tun tiha.
Konsekuensia husi arguidu nia hahalok nee halo lezada sente moras hodi ba hatoo keixa, no halo tratamentu iha Pradet durante loron rua.
Tanba nee, Ministeriu Publiku akuza arguidu komete krimi Violensia Domestika ho forma Ofensa Integridade Fizika Simples neebe previstu iha artigu 145 husi Kodigu Penal.
Hatan ba akuzasaun neebe iha, arguidu deklara katak, momentu neeba arguidu no lezada nia relasaun hanesan namoradu la iha ona, no sira nain rua la iha kontaktu ba malu durante fulan tolu ona.
Arguidu deklara, sira la iha ona relasaun kontaktu, tanba nee arguidu mos iha doben foun ida, no iha loron 2 fulan Julhu arguidu ho nia doben ba iha Metiaut, momentu neeba sira atu fila. Derrepente lezada neebe hanesan arguidu nia eis doben mosu ba iha kareta oin, loke odamatan no lori liman rakut kedas arguidu nia doben, arguidu mos hamriik hodi hafahe tiha sira nain rua.
Iha momentu neeba, tanba lezada koalia barak arguidu nia doben mos kontaktu ba nia kolega hodi tula tiha nia fila, no lezada ho arguidu mak iha hela fatin refere.
Arguidu deklara, iha fatin neeba mosu diskusaun entre arguidu no lezada, halo arguidu nervozu lori liman tuku lezada. Arguidu deklara, arguidu koalia beibeik ba lezada atu hakotu sira nia relasaun domin, maibe lezada lakohi simu, tanba nee arguidu halo relasaun domin ho feto seluk, halo lezada sente la diak hodi kria problema.
Arguidu deklara, hahu husi problema too mai agora la iha tan problema ona. No arguidu deklara, razaun hakara hases aan husi lezada, tanba iha sira nain rua nia relasaun domin sempre mosu problema.
Iha sala julgamentu laran lezada deklara katak, momentu neeba lezada no arguidu mosu duni problema, no arguidu deside atu sira nia relasaun domin remata ona, maibe lezada hateten ba arguidu katak, relasaun nee atu hotu sira nain rua tenke hasoru malu koalia ba malu.
Lezada rekonhese sira la iha duni kontaktu durante fulan tolu, maibe seidauk iha serteza lo-loos katak sira nia relasaun domin hotu ona, tanba sira seidauk hasoru malu hodi deside lo-loos.
Lezada deklara, iha Metiaut lezada haree arguidu ho karreta, tanba nee lezada lao tuir ba atu hase, maibe lezada loke odamatan karreta haree arguidu ho feto ida, tanba nee mak lezada nervozu rakut malu ho feto nee.
Lezada deklara, arguidu baku lezada iha karreta nia sorin, depois lori ba iha tasi ibun, no kontinua lori ba iha karreta laran hodi tuku lezada. Lezada deklara agora ho arguidu nia relasaun la iha ona.
Audensia julgamentu nee prezide husi Juiz Singular Ivan Suritai, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku Manuel Exposto.
(ter)