DILI, STLTIMORLESTE.com – Tribunal Judisial Primeira Instansia Dili liu husi leitura sentensa, deside kondena arguidu ho inisial TOS hanesan oknum FALINTIL Forsa Defeza Timor Leste (F-FDTL) ho pena multa US$ 90.00.
Iha sala julgamentu laran loron Sesta nee, Juiz Fransisca Cabral deklara katak, Ministeriu Publiku akuza arguidu krimi omisidiu neglijente neebe previstu iha artigu 140 Kodigu Penal.
Antes nee iha produsaun provas Tribunal rona ona deklarasaun arguidu nian, no arguidu konfesa imparsial ba faktus, no entrega ona osan no karau iha ba iha familia matebian nian, no sira diak malu ona.
Tetu sirkunstansia sira nee hotu, ikus mai Tribunal deside aplika pena multa ba arguidu, no Tribunal mos deside durante fulan tolu arguidu la konduz motor. Tribunal mos fo hanoin arguidu atu loron seluk utiliza motor tenke halao kontrola ho velosidade neebe iha.
Antes nee, iha alegasaun Prokurador Hernani Rangel deklara katak, arguidu konduz motor la ho kuidadu, mak ikus mai kauza lezada mate. Prokurador konsidera, faktus neebe iha prienxe elementu krimi omisidiu neglijente, tanba nee Prokurador husu Tribunal atu kondena arguidu pena prizaun tinan 1, suspende ba tinan 2.
Prokurador mos husu ba Tribunal atu desizaun Tribunal nian sai haruka mos ba iha arguidu nia superior hodi fo samada ba arguidu atu utiliza motorizada ho kuidadu.
Enkuantu husi parte defeza Manuel Exposto husu Tribunal tetu sirkunstansia hotu, tanba arguidu foin primera vez mai iha Tribunal, konfesa imparsial, husu Tribunal atu aplika pena multa ba arguidu.
Tuir akuzasaun katak, iha loron 12 fulan Fevereiru tinan 2024, iha oras maizumenus 12h00 meudia, iha Hera Metinaro, momentu neeba arguidu konduzia motorizada ho marka Honda CRF kor mean ho nia sapa matrikula T.2720.TL, husi diresaun Dili atu ba Metinaro.
Bainhira arguidu konduzia motorizada refere too iha Cruz boot (dalan atu ba Metinaro), arguidu halai ho velosidade neebe mak makaas hodi ultrapasa kareta ida neebe mak halai hela iha Estrada oin.
Bainhira iha ultrapasa nee, arguidu laiha atensaun ba oin, nunee mosu mos motorizada ida neebe mak konduzia husi lezada nia kaben halai husi diresaun Dili atu ba Metinaro, nunee tanba falta de kuidadu husi arguidu, ho nunee arguidu soke kedas motorizada neebe mak lezada ho nia kaben konduzia husi parte kontrariu.
Iha asidente nee, konsege motorizada rua hetan estragus, nunee mos lezada hetan soke no monu tun kedas ba alkatraun leten, rezulta lezada nia ulun baku ba rai kauza kanek no halo mos raan sai barak husi ulun.
Bainhira asidente nee mosu, evakua kedas lezada ho arguidu ba HNGV hodi hetan sukoru ou tratamentu, maibe lezada mos mate, tanba hetan sofre kanek iha ulun.
Konsekuensia husi asidente nee mak kauza lezada mate Iha HNGV, tanba hetan kanek iha ulun, nunee halo lezada nia raan sai barak husi ulun no labele salva lezada nia vida.
Arguidu ho neglijente no la ho kuidadu bainhira konduzia motorizada iha dalan publiku, hodi hamosu asidente, nunee rezulta lezada hetan soke no ikus mai lezada mos mate.
Tanba nee, arguidu hanesan autor material ba pratika krimi omisidiu neglijente, previstu tuir artigu 140 numeru 1 husi Kodigu Penal.
Audensia julgamentu nee prezinde husi Juiz Singular Fransisca Cabral, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Manuel Exposto.
(ter)
