DILI, STLTIMORLESTE.com – Troka lideransa iha Munisípiu Aileu presiza lori mudansa real no hatudu kompromisu hodi servi komunidade ho diak, hafoin Primeiru Ministru (PM, Kay Rala Xanana Gusmão nomeia Jacinto Ribeiro Dias nuudar Prezidente Autoridade Munisípiu (PAM) Aileu foun, hodi troka João Bosco dos Santos.
Lian nee fo sai husi Akademista Universidade da Paz (UNPAZ), Marcos Soares hodi responde ba nomeasaun foun iha munisipiu refere.
“Troka lideransa nee foti espasu ba mudansa. Lider foun presiza hatudu kompromisu boot hodi servi povu no fo atensaun seria ba prioritiza nesesidade komunidade nian, liu-liu infraestrutura bazika, saude no edukasaun iha aea rurais Aileu,” dehan Marcos Soares ba STL, iha Dili, Kinta nee (23/07/2036).
Nomeasaun ba Jacinto Ribeiro Dias hodi troka João Bosco dos Santos nee bazeia ba Despachu N.º 10/PM/VII/2026 neebs assina husi Xefe Governu.
Proposta nomeasaun nee mai husi Ministru Administrasaun Estatal (MAE) liuhusi karta ho referensia 183/M-MAE/VII/2026, iha loron 22 Jullu 2026, hodi rekomenda Jacinto okupa kargu foun nee.
Akademista nee subliña katak ho estutura lideransa foun nee, papel administrasaun publika iha munisípiu presiza lao ho transparensia no efisiensia boot liu hodi responde lalais ba nesesidade povu nian.
Iha fatin ketak, Observador Polítika, Carlito de Araújo hateten katak, nomeasaun kargu PAM nee laos deit troka figura, maibe kestaun kualidade servisu nian.
Nia husu ba PAM foun Aileu nee atu kria koordenasaun neebe metin ho Governu Sentral no rona nafatin lian husi basiku. “Garantia ba susesu lideransa foun nian sei haree husi oinsa nia simu kritika no transforma polítika governu nian sai aksaun real neebe komunidade Aileu sente duni nia benefísiu,” dehan Carlito.
Entretantu nomeisaun nee bazeia ba karta husi Ministru Administrasaun Estatal (MAE), liu husi karta ho referensia 183/M-MAE/VII/2026, loron 22 Jullu 2026, propoin Jacinto Ribeiro Dias atu okupa kargu hanesan PAM Aileu foun.
Tanba konsidera katak perfil pesoal no profisionál kandidatu neebe MAE propoin nee adekuadu ho natureza, responsabilidade no ejijensia kargu no funsaun sira neebe sei halao, no mos ho objetivu Governu nian ba Autoridade Munisipal sira.
Tan nee tuir razaun sira neebe temi ona, Primeiru-Ministru deside, Exonera, ho efeitu imediatu, tuir n.º 1 artigu 21.º husi Dekretu-Lei n.º 3/2016, loron 16 Marsu, ho redasaun husi Dekretu-Lei n.º 34/2026, loron 15 Outubru, João Bosco dos Santos husi kargu hanesan PAM Aileu no nomeia fali PAM Aileu foun.
“Nomeia, ho efeitu imediatu, tuir n.º 1 artigu 21.º husi Dekretu-Lei n.º 3/2016, loron 16 Marsu, ho redasaun husi Dekretu-Lei n.º 34/2026, loron 15 Outubru, Senhor Jacinto Ribeiro Dias atu halao kargu hanesan Prezidente Autoridade Munisipal Aileu, hahu husi loron tomada de posse tuir dispozisaun legal sira,” hatete dokumentu neebe STL asesu husi Jornal Republika.
(car)
