AMBENO, STLTIMORLESTE.com – Ikus-ikus ne’e transporte roda tolu konhesidu ho naran Tum-Tum sai hanesan transporte alternativu ba povu neebe hela iha area rai tetuk iha Oekusi.
Tuir Xefe Suku Costa, Postu Administrativu Pantemakassar, Rejiaun Administrativu Espesial Oekusi-Ambeno, Francisco Colo ba STL iha Bairu Sanane, Segunda (27/01/2025) katak, prezensa Tum-Tum sai hanesan transporte alternativu ba povu rai tetuk iha Oekusi, tanba halai neineik no la iha asidente neebe ameasa ema nia vida.
“Hau hanesan Xefe Suku Costa haree transporte publiku Tum-Tum iha vila Oekusi nuudar alternativu ba povu liu-liu iha area rai tetuk, tanba laiha polusaun no halai ho velosidade neineik liu, ida nee la hamosu asidente trafiku,” dehan nia.
Iha oportunidade nee Frederico Pereira Mendes husi Munisípiu Likisa mós dehan, Tum-Tum nuudar transporte ho medida kiik, fasil atu halo movimentu iha sidade, nia impaktu mak sempre hamosu engarrafamentu iha sidade tanba halai neineik, maibe sempre hamenus númeru dezastre trafiku.
“Hau haree Tum-Tum mos kontribui ba enviromen tanba ita laiha suar hodi hamosu polusaun,” dehan nia.
Nunee mos operador Tum-Tum Oekusi, Nelson Sarmento mos rekonhese katak Tum-Tum hanesan transporte alternativu, maibe daudaun nee hasoru problema kona-ba rendimentu, ikus-ikus nee loron ida hetan deit osan US$ 15 hanesan nee, nee mos sorte mak hetan, se lae atu hetan deit US$ 5 mós araska.
Iha biban nee nia husu ba Governu Autoridade Rejiaun Administrativa Espesial Oekusi-Ambeno (RAEOA) atu hadia estrada iha vila Pantemakassar liu-liu tama ba merkadu Nunbei, estrada la diak bele ameasa operador Tum-Tum bakufila. Aleinde nee estrada iha area masin no estrada balu iha kapital Oekusi balun seidauk tau alkatraun, ida nee fó risku ba Tum-Tum no transporte roda tolu seluk.
“Hau husu ba Governu Autoridade RAEOA, sei bele karik tau ona planu hodi hadiak estrada diresaun balu iha Kapital Oekusi atu tau aspal, tanba ida nee fó risku ba ami operador ka motorista Tum-Tum iha vila Oekusi,” dehan nia.
Nia dehan, liga ho rendimentu, daudaun nee menus ona tanba Tum-Tum iha Oekusi barak ona kompara uluk no agora, uluk nee diak liu, agora araska.
Tuir observa STL iha Kapital Oekusi, movimentu transporte Tum-Tum mak domina ona iha sidade no halo operasaun loron kalan hodi fasilita komunidade sira sirkula iha Oekusi.
(jos)