DILI, STLTIMORLESTE.com – Universidade balu seidauk hatama sira nia pedidu lista finalista ba Ministeriu Ensinu Superior Siensia no Kultura (MESSK).
Ministru Ensinu Superior Siensia no Kultura (MESSK), Jose Honorio da Costa Perreira Jeronimo hatoo kestaun nee ba jornalista sira iha salaun CNC Balide, Sesta nee (28/02/2025).
“Ministeriu iha ona baze de dadus kona-ba ita nian ensinu superior sira nee, neebe lalika manual, maibe bele uza, no sira bele hatama sira nian pedidu ba kandidatus finalista sira nian, depois Ministeriu aprova sira bele halao sira nian atividades graduasaun, dia 15 agora institutu ida mak sei halao graduasaun, balu seidauk hatama sira nian pedidu mai ami,” dehan nia.
Iha fatin seluk, Mateus Maia de Jesus hanesan Reitor EAST Timor Coffee Institute (ETCI) dehan, bainhira atu halao graduasaun, instituisaun ensinu superior sira tenke submete uluk naran estudantes finalista neebe atu halao graduasaun, tanba nee antes fulan Maiu ETCI sei haruka lista nee ba MESSK.
“Dia 17 Maiu, ho total ami nian estudantes finalista sira hamutuk 150 mak sei halao graduasaun iha fulan Maiu tinan nee nian laran, husi numeru neebe mak ohin hau mensiona kompostu husi fakuldade tolu mak hanesan fakuldade agrikultura, edukasaun no ekonomi, fakuldade tolu nee ninia departamentu sia. Agora daudaun lista ami prepara ona atu submete ba MESSK, tanba nee ami sei submete lista ida nee iha fulan Marsu nian laran, nee duni bainhira hatama ona lista, hodi hein ba iha graduasaun ba finalista hirak neebe remata ona sira nian estudu,” nia dehan.
(jac)
