BAUCAU, STLTIMORLESTE.com – Hafoin restu mortais Bispu na’in tolu fila mai Timor-Leste, veteranu sira husu Governu atu kontinua buka restu mortais rezisténsia sira, inklui Prezidente Nicolau Lobato.
Veteranu tinan 24, Fernando “Beredu’u” Gusmão hato’o apresiasaun ba Prezidente Repúblika no Primeiru-Ministru, tanba esforsu Governu ne’ebé konsege lori fila restu mortais Bispu Jaime Garcia Goulart, Bispu José Joaquim Ribeiro no Monsenhor Martinho da Costa Lopes, ne’ebé durante tinan naruk hakoi iha Portugal.
“Ami kontente ho Prezidente no Primeiru Ministru nia esforsu, mak ita nia Bispo nia ruin to’o fali mai iha Timor. Nee mak sentidu domin Timor-oan nian,” hatete Fernando ba STL iha Vila Nova Baucau, Kuarta (02/09/2026).
Maibé, nia husu Governu atu la para iha esforsu ne’e de’it. Maibé esforsu no lori fila mos restu mortais Timor-oan sira ne’ebé mate no lakon durante períodu funu iha tempu okupasaun Indonézia, liuliu sira ne’ebé iha papel importante iha istória rezisténsia Timor-Leste.
Nia mensiona, espesialmente Prezidente Nicolau Lobato, inklui Kiliki Wai-Gae, Vicente Reis no David Alex ne’ebé to’o agora nia restu mortais seidauk hetan. Fernando husu Governu atu kontinua koordenasaun ho Governu Indonézia hodi buka tuir nia restu mortais husi saudozu hirak ne’e.
“Hanesan Prezidente Nicolau Lobato, ne’ebé to’o ohin loron nia restu mortais seidauk hetan, Prezidente ho Primeiru-Ministru tenke koordena nafatin ho Indonézia para buka tuir, tanba David Alex nian nee sira dehan nia ruin iha ona, maibé família balu la aseita,” hatete nia.
Fernando konsidera relasaun Timor-Leste ho Indonézia agora diferente ona kompara ho tempu okupasaun, tanba iha relasaun diplomátika no konsidera malu hanesan amigu.
“Nee mak hau rekomenda, Maun Boot na’in rua tenke buka tuir mos sira ne’e. Tanba Indonézia uluk ita inimigu, maibé agora kolega ona. Sira na’in rua tenke haree oinsá mak bele hetan fali ita nia maluk sira ne’e nia ruin. Sira na’in rua mak hatene,” hatete nia.
Apelu ne’e, tuir Fernando, la’ós de’it kona-ba lori fila ema ne’ebé mate, maibé mos kona-ba fó dignidade ba sira nia família no preserva memória ema sira ne’ebé kontribui ba luta no istória Timor-Leste nian iha futuru.
(tom)
