Veteranus Oekusi lamenta Sekretaria Rejional Finansas Abandona Servisu

Sekretariu Ezekutivu Konselhu Veteranus Rejional Oekusi, Xisto Sousa. (Foto: STL/Joseph Koa)

OEKUSI, STLTIMORLESTE.com – Veteranus Oekusi lamenta ho Sekretaria Rejiaun Finansas, Elvira Manat neebe abandona ninia servisu durante fulan tolu ona.

Lamentasaun nee hatoo husi Sekretariu Ezekutivu Konselhu Veteranus Rejional Oekusi, Xisto Sousa ba jornalista sira iha Edifisiu Komselhu Veteranu Oekusi, Segunda (27/01/2025).

“Hau nuudar Sekretariu Konselhu Veteranus Rejional Oekusi, lamenta ho Sekretaria Rejional Finansas abandona servisu iha Oekusi, ida nee impede dezenvolvimentu Oekusi, liu-liu iha area Finansas,” dehan nia.

Nia haktuir Tan katak, sei Sekretaria Rejional Finansas abandona ona ninia servisu, fo todan ba funsionamentu Estadu iha area orsamentu liu-liu projetu hirak neebe planeadu tiha ona atu realiza iha Oekusi, servisu aprovizionamentu paradu entaun povu ho funsionariu, diretor no xefe departementu sira neebe servisu iha Sekretariu Rejiaun Finansas mak sai vitima.

Iha sikun seluk, Prezidente Autoridade Rejiaun Administrativu Espesial Oekusi-Ambeno (PA-RAEOA), Rogerio Tiago de Fatima Lobato konsidera durante nee Sekretaria Rejional Finansas Faltozu.

“Ohin ita haree iha nee, Sekretaria Rejional hotu-hotu partisipa iha serimonia dezaminasaun Orsamentu Jeral Estadu no Programa Asaun Anual hodi lori dezenvolvimentu iha Oekusi-Ambeno, maibe Sekretaria Rejional Finansas Faltozu, tuir loos nia mak tenke iha nee hodi responsabiliza orsamentu Estadu, maibe nia la marka prezensa,” dehan PA-RAEOA, Rogerio Tiago de Fatima Lobato iha Oekusi, Sesta semana kotuk.

Too notisia nee hatun, seidauk hetan konfirmasaun husi atual Sekretaria Rejional Finansas, Elvira Manat tanba laiha Oekusi.

(jos)

Share it :

Leave a Reply

Your email address will not be published. Required fields are marked *