DILI, STLTIMORLESTE.com – Kazu Violensia Domestika nee krimi publiku, maibe tama iha Tribunal nia prosesu kleur difikulta mos feto neebe mak hela dook.
Feto Potensia, Maria Amaral hatete, presiza haree kona-ba kazu violensia domestika nee, tanba dala barak feto sira lakohi hatoo keixa tanba too Tribunal hein prosesu kleur fo impaktu ba sira neebe hela dook.
“Ita hatene katak kazu violensia domestika nee krimi publiku, se deit mak hetan bele hatoo keixa, maibe dala barak vitima sira dehan katak nia prosesu nee kleur demais, halo sira neebe mak hela dook susar, tanba balun hela iha area remotas mai halo prosesu julgamentu, ida nee mos fo impaktu ba sira,” dehan Maria ba STL iha nia knaar fatin Kaikoli, Dili, Segunda (06/01/2025).
Nia hatutan, sira neebe mak hela besik iha tribunal sira nee sente diak, hein kleur laiha problema, maibe problema ba sira neebe mak hela dook, ezemplu iha Uatukarbau no Ilomar, no fatin remotas sira mai tuir prosesu julgamentu iha Tribunal Distrital Baukau no fatin seluk tan, ida nee difikulta sira.
Nunee mos Prezidente Konselhu Diretoria Rede Feto Timor Leste, Zelia Fernandes afirma, durante realiza konferensia munisipiu neebe mak Rede Feto halao iha Munisipiu sira identifika problema barak mak feto no labarik inklui ema ho defisiensia hasoru.
Nunee mos asuntu seluk tan neebe deskobre mak area edukasaun nia barak kontinua tau kestaun mak kona-ba infraestrutura neebe aat, ezemplu edefisiu eskola neebe kondisaun aat sala de aula menus, profesores menus, no konstrusaun infraestrutura neebe mak la asesivel, mezmu ema ho defisiensia hakarak asesu maibe eskola laiha rampa atu fasilita estudante ema ho defisiensia atu asesu.
(eme)
