DILI, STLTIMORLESTE.com – Primeiru Ministru (PM), Kay Rala Xanana Gusmão apela ba juventude sira atu labele lakon oportunidade, maibe nafatin kapasita aan ho estuda no aprende, tanba joven mak futuru ba nasaun Timor Leste.
Xefe Governu hato’o kestaun nee iha abertura formasaun ba juventude sira neebe organiza husi Movimentu Fileira Xanana neebe lidera husi Maria Auxiliadora da F. Cardoso iha Salaun Sentru Formasaun Salvador Training Institute (STI), Surikmas, Dili, Sabadu (30/5/2026).
PM Xanana hatete katak, lideransa husi 1975 neebe agora daudaun ukun nasaun nee idade katuas hotu ona, tanba nee atu lori nasaun nee ba futuru, juventude labele lakon oportunidade, tenke kapasitaan ho estuda no aprende iha area oi-oin.
“Imi tenki kapasita aan ho estuda no aprende liu husi edukasaun formal no non formal. La bele lakon oportunidade, nafatin estuda, aprende no adapta ho teknolojia neebe avansadu tebes iha mundu,” katak Xanana.
Entretantu, Prezidente Movimentu Fileira Xanana, Maria Auxiliadora da F. Cardoso hateten, nia orgulhu no agradese tebes ba prezensa PM Xanana Gusmão nian iha serimonia abertura formasaun ba juventude sira iha Sentru Formasaun STL CORP.
“Ami agredese tebes ba ita nia nai ulun Avo Nana neebe mak prezensa iha fatin ida nee. Ami orgulhu no apresia tebes. Hanesan joven, ami kontenti tebes, tanba Avo Nana hatoo mensajen ba juventude sira atu kapasita aan, aumenta sira nia matenek iha area oi-oin,” dehan Maria.
Nia dehan, Avo Nana mos apela ba juventude sira atu aumenta matenek liu husi edukasaun formal no non formal, estuda no aprende nafatin iha area oi-oin, la bele lakon oportindade.
Prezidente Movimentu Fileira Xanana nee mos esplika katak, formasaun nee ho durasaun fulan tolu (3) ho formadu sira mai husi estudante, juventude no sira neebe servisu tiha ona, maibe hakarak aumenta sira nia matenek liu husi formasaun nee.
Nia dehan, formasaun nee fokus liu ba sira neebe laiha kbiit no forsa atu selu formasaun bainhira sira tuir formasaun iha fatin seluk. Tanba nee, Movimentu Fileira Xanana organiza formasaun iha area tekniku, ingles no portugues ho gratuita.
“Ami iha formador nain nen (6) neebe iha esperiensia barak no matenek atu fahe sira nia matenek ba juventude sira iha area tekniku, ingles no portugues,” katak Maria.
Prezidente Movimentu Fileira Xanana neebe akompanha husi formadora lingua ingles, Cidalia Mesquita, Koordenadora Arte no Kultura Movimentu Fileira Xanana, Sonia de Jesus Pereira no Koordenador Administrasaun Movimentu Fileira Xanana, Noemia de Jesus Jelsinhe, hatete katak, formasaun ho durasaun fulan tolu nee formadu sira bele aprende no aumenta sira nia matenek hanesan bukae ida ba sira nia futuru.
Serimonia nee remata ho foto hamutuk PM Xanana ho strutura Movimentu Fileira Xanana neebe lidera husi Maria Auxiliadora da F. Cardoso ho membru sira, inklui formador no formadu sira.
(mik)
