DILI, STLTIMORLESTE.com – Relasiona ho selebra loron semana Mundial Oseanu tinan 2025, Primeiru Ministru (PM), Kay Rala Xanana Gusmão husu ba iha joven no labarik sira atu kuidadu ita nia tasi.
“Partisipasaun kapas tanba haree joven sira mak barak, mai husi eskola, universidade ida ka rua nee atu hatudu juventude komesa preokupa ho sira nia futuru rasik, ita halo buat sira nee serimonia lao hamutuk nee laos dehan katak Governu matenek lae, ida nee atu fo hanoin ba joven hotu-hotu, liu-liu ba labarik sira katak, se ita la kuida ita nia tasi hahu agora imi nia futuru sei susar tebes-tebes,” dehan PM Xanana Gusmão iha abertura ba selebra semana Mundial iha Portu Dili, Sabadu (07/06/2025).
Tuir PM katak, saida mak halo agora laos ba sira neebe idade ona, nee halao iha munisipiu hotu liu-liu ho partisipasaun labarik sira husi eskola, tanba tasi importante tebes ba ita nia vida, dala ruma ita hanoin katak la iha ida, maibe hotu-hotu ohin loron sente hela mudansa klimatika.
Nia dehan, udan la mai la presiza mai estraga buat hotu, estraga buat hotu-hotu no estraga tan ita nia produsaun, ida nee sai lisaun ba mundu tomak, laos Timor Leste mak halo inisiativa ida nee, no saida mak halo iha semana ida nee lao hamutuk ho mundu tomak.
“Joven no labarik sira neebe sei iha eskola, kuandu temi hau nia tasi hau nia Timor nee katak, se hau la kuidadu hau nia tasi, hau nia Timor nee sei sai oinsa. Husu atu buat sira nee lao nafatin, liu-liu ba labarik sira tanba futuru iha imi nia liman, futuru Timor neebe diak halao hahu agora,” katak PM Xanana.
PM preokupa ohin loron lixu foer laos deit iha tasi ibun no mota ninin, maibe iha mos bairu sira.
“Lixu foer laos deit iha tasi ibun no mota ibun, maibe iha bairu sira nee hotu soe arbiru, dala ruma fahi mak bakufila tiha buka hahan ruma soe hela iha neeba no asu, xefi suku, xefi aldeia no joven sira la iha liu konsiensia, tanba nee mak serimonia neebe halao iha semana ida nee nia laran nee hodi haburas konsiensia foun hanoin foun, liu-liu ba joven no labarik sira, tanba iha futuru imi mos sei enfrenta difikuldade barak liu, karik ohin loron la kuidadu,” dehan PM.
PM hatutan, semana ida nee loke atividade ho talentu oin-oin, labele para ho ida nee tenke kontinua. No mos kona-ba atividade ekonomia nian, tanba ita hakarak dezenvolve ita nia rain ita tenke hadia diak liu tan oinsa ita tein rasik ita nia hahan, labele foto kopy hela deit.
No ita atu hatudu ita nia turizmu ekonomia tenke tein hahan ita nian, halo uma kiik baraka oan atu turista sira hela.
Tuir observasaun STL nian, depois de remata abertura nee partisiipantes sira hakat kedan ba koko hahan tradisional neebe mak prepara ona.
No selebrasaun nee marka prezensa barak liu husi estudante no joven sira neebe mai ho talentu la hanesan.
(ter)
