DILI, STLTIMORLESTE.com – Gruta Nain Feto Maria iha Golgota, Komoro, Dili, kontinua sai destinasaun espiritual ba sarani sira iha kapital Dili, hodi buka dame no hakmatek liu husi orasaun ka reza tersu no reflesaun.
Maski sidade Dili nakonu ho atividade no movimentu transporte neebe makas, maibe ambiente iha Gruta laran mantein ninia hakmatek. Sarani barak uza tempu dader no loraik hodi hakseik aan ba Maromak, hodi hatoo hotu sira nia laran todan iha fatin santu nee.
Sasin husi sarani sira neebe vizita fatin nee hatudu katak, orasaun iha Gruta Golgota fo fali kbiit no kman ba vizitante sira. Ambiente iha neeba sente nakonu ho silensiu neebe klean lori vizitante sira, hodi ses uituan husi atividade moris loron loron nian.
“Fatin nee lori dame mai ami. Bainhira mai reza tersu iha nee, kuandu ami fila ba uma, ami sente kman no iha enerjia foun,”dehan vizitante Romana Soares ba STL, iha Gruta Golgota, Komoro, Dili, Tersa (26/05/2026).
Romana mos fiar katak liuhusi orasaun tersu neebe nia halo ho laran metin, nia bele hetan kmaan hodi hamenus fali preokupasaun sira neebe nia hasoru iha ninia moris loron loron.
Iha fatin hanesan vizitante seluk, Luciana de Araujo hatutan katak, ninia prezensa iha Gruta nee nuudar dalan ida hodi hetan kbiit foun hodi foti drsizaun ba moris nian.
Nia dehan, silensia neebe iha fatin nee ajuda tebes nia bele hanoin ho laran moos no hakmatek.
Aleinde sai fatin devosaun ba inan Maria Gruta Golgota mos funsiona hanesan fatin ba reflesaun pesoal. Sarani sira neebe mai sempre kimpre nafatin regra silensiu nian hodi mantein santidade fatin nian, hodi nunee vizitante hotu bele sente prezensa divinu neebe hanesan.
Too ohin loron, Gruta Golgota nakloke nafatin ba publiku no sai sasin ba fiar sarani nian neebe metin iha Timor-Leste (TL), liuliu ba sira neebe presiza fatin hakmatek no harohan.
(car)
