DILI, STLTIMORLESTE.com – Koordenadór Jerál MCAE, Jorge Rui de Araujo hatete, setor produtivu tenke sai matéria importante atu diversifika ekonomia no kria atividade ekonomika foun.
Nia hatete, kualidade infraestrutura la’ós de’it uma ka makina, maibé inklui enkuadramentu legal ne’ebé bele suporta dezenvolvimentu no seguransa ba atividade ekonomika.
“Ita atu diversifika ekonomia, setor produtivu hanesan agrikultura, floresta, peskas no pekuária sai ita nia matéria importante atu diversifika manufatura, indústria ki’ik sira no indústria uma-kain,” dehan Koordenadór Jerál MCAE ba Jornalista Sira iha Salaun CNE Lariguto Tersa (15/09/2026).
Nia mós destaka politika ekonomia azul, ne’ebé Primeiru-Ministru sai motor, atu kapitaliza rekursu bee hanesan tasi, mota no bee-dalan sira sai fonte rendimentu no finansiamentu ba atividade ekonomika iha baze.
Tuir nia, ekonomia azul la’ós de’it foka ba tasi, maibé mós inklui aquikultura no agro-pekuária atu fó rendimentu ba povu iha komunidade.
Iha área kooperativa, SECoop hahu forma grupu kooperativa iha munisípiu to’o suku sira, ho objetivu atu kapitaliza grupu no kria oportunidade ekonomika.
Nia mós ko’alia kona-ba turizmu komunitáriu, liuhusi kapitalizasaun infraestrutura natural iha bairro no aldeia sira atu sai fonte rendimentu ba komunidade.
Iha área kosteira no rurál, inan-feto sira bele kapitaliza atividade hanesan habai ikan maran no kuda du’ut tasi, ne’ebé bele dezenvolve ba produtu esportasaun no indústria ki’ik.
Nia subliña katak, haforsa ekonomia uma-kain no diversifika indústria ki’ik sei permite povu partisipa diretamente, aumenta rendimentu no sai nain ba atividade ekonomika.
(joa)
