BOBONARO, STLTIMORLESTE.com – Autoridade Nasional Minerais (ANM) ofisialmente atribui ka fo lisensa prospesaun no peskiza ba minerais metalikus no elementu de terras raras, ba Kompanhia Minerasaun Estatal, Murak Rai Timor, E.P neebe sei halao operasaun iha Munisipiu Bobonaro.
Emisaun lisensa nee sai nuudar pasu esratejiku ida hodi dezenvolve sekuariu minerais iha rai laran, nunee mos bele identifika potensial rekursu natural neebe bele fo benefisiu ekonomiku boot ba Estadu no komunidade lokal.
Atividade prospesaun no peskiza nee foka liu ba kategoria minerais no elementus de terras raras, rekursu kimiku neebe importante iha industria teknolojia moderna no tranzisaun enerjetika global. Kompanhia Murak Rai Timor neebe simu lisensa, iha responsabilidade hodi kumpri regulamentu ambiental no sosial neebe vigora ona iha Timor-Leste (TL).
Liu husi diskursu neebe reprezenta Ministru Petroliu Rekursu no Minerais, Prezidente Autoridade Nasional Minerais ( ANM), Rafael de Araujo deklara katak, iha fim du anu tinan ida nee ka se lae mos tinan oin, Timor-Leste sei iha mos fábrika marmore ka marver neebe ninia estudu finaliza ona, nunee mos previzaun ba fabrika semente iha Lautem no Manatuto.
“Ita fo ona lisensa ba ita nia empreza Murak Rai Timor ho sira nia paraseiru, buat hotu lao diak, estudu nee agora finaliza ona, fin du anu mais tarde inisiu tinan oin ita iha ona fabrika marvel,”hatete Rafael liu husi diskursu, bainhira partisipa iha eventu emisaun ba lisensa prospesaun no peskiza ba minerais metalikus& elementu de terras raras neebe halao, iha salaun Parokial, Postu Administrativu Bobonaro, Munisipiu Bobonaro, Sesta (22/05/2026).
Iha ninia diskursu Prezidente Autotidade Nasional Minerais (ANM) nee hatoo agradesimentu klean ba suporta neebe durante nee Munisipiu Bobonaro ho Covalima para fo ona ba kbiit empreza estatal Murak Rai Timor, hodi nunee atividade foun nee bele lao ba oin.
Rafael de Araújo dehan, Ministeriu Petroliu no Rekursu Minerais (MPRM) nia papel tebes ba dezenvolvimentu ekonomia rai laran, tanba kuaze orsamentu neebe Estadu gasta mai husi petrolifeu no rekursu minerais nian, liuhusi instituisaun lubuk ida neebe halao knaar importante.
Parte Autoridade Nasional Minerais (ANM) mos hanoin katak atividade minerasaun nee sei dudu tan dezenvolvimentu infraestrutura bazika sira, hanesan hadia estrada at sira neebe liga Bobonaro ba Covalima, ponte no portu sira, hodi nunee bele loke asesu ba merkadu no hadia povu nia moris diak.
Prezidente Autoridade Nasional Minerais nee fiar katak ho atividade no peskiza foun nee, bele fo oportunidade servisu barak liu tan ba joven feto no mane sira, liuliu iha Nunisipiu Bobonaro no mos Covalima neebe sai nuudar fatin operasaun.
Iha fatin hanesan Prezidente Murak Rai Timor, Jose Goncalves fundamenta katak, empreza publiku nee simu ona lisensa tolu, neebe nuudar kontinuasaun husi autorizasaun atividade rekonhesimentu nian neebe hetan iha tinan 2024.
“Lisensa tolu neebe ami foin simu nee fo ami servisu lubuk ida, inklui halo servisu tekniku sira hanesan mapamentu jeolojia, jeifizika, projetu kimiku sira hodi halo desizaun no buka trajetu para bele halo produsau,” Jose dehan.
Prezidente Murak Rai Timor nee haktuir katak, bazeia ba dadus neebe foti ona iha terrenu durante tinan ida liuba, lalais liu kompanhia bele mos komesa fura iha fulan Setembru tinan ida nee ka tarde liu iha Janeiru tinan oin, depende ba situasaun kbiit nian iha terrenu.
Entretantu Reprezenta Prezidente Autoridade Munisipiu Bobonaro, Semedo L. Costa hatoo agradesimentu ba lideransa Ministru Petroliu Rekursu no Minerais ho Dirijente tomak, tanba liu husi servisu esforsu nian bele haree ona progresu neebe diak.
“Keta haree deit ba mina, ita hahu dadaun ona para estudu sira neebe halo tinan ba tinan ohin ita bele komesa ona hahu esplorasaun. Buat ida sei hahu estudu nee buat ida karik sei dok, mais kuandu tama ona ba esplora entaun karik ida nee besik dadaun ona, ita bele sente katak durante nee estudu sira neebe halo fo duni rezultadu diak, para ohin ita bele hahu,” hatete Semedo.
No ikus lia Semedo mos hatoo obrigadu ba empreza estatal Murak Rai Timor neebe servisu hamutuk ona ho Ministeriu Petroliu Rekursu no Minerais (MPRM) liuliu Autoridade Nasional Minerais (ANM) hodi bele deskobre riku soin minerais neebe subar iha rai laran.
(car)
