DILI, STLTIMORLESTE.com – Hahu husi loron 19 fulan Maiu too horiseik, dadus provizoriu aplikantes bolsa kandidatu profesores neebe partisipa ona iha teste hamutuk 5.091, husi numeru nee 317 mak pasa ona ho valor 60 too 81 no 82.
Kestaun nee hatoo husi Diretor Nasional Rekursu Umanu husi Ministeriu Edukasaun, João Amaral ba jornalista STL iha nia knaar fatin Vila Verde, Tersa nee (03/06/2025).
João afirma, dadus provizoriu nee 317 mak pasa ona iha bolsa kandidatu professores, hahu husi loron 19 Maiu too horseik total aplikantes neebe partisipa ona iha teste nee hamutuk 5091 mak partisipa ona iha teste, nee mak foin liu nee 317, nee ho valor 60 too 81 no 82, nee provizoriamente.
“Dadus provizoriu agora daudaun nee iha aplikantes bolsa kandidatu hamutuk rihun 5 resin neebe partisipa ona iha teste, husi numeru nee 300 resin mak pasa ona iha teste, nee husi valor neebe mak ita iha, balun iha 60, hirak neebe mak valor aas nee mak 81 no 82, dadus nee hahu husi loron primeiru halo teste iha loron 19 Maiu too horiseik, teste nee sei kontinua halo ba aplikantes sira too dia 17 fulan nee foin remata halo teste,” nia afirma.
Nia dehan, tuir lo-loos lugares nee iha 1450 lugares, tanba nee kada loron sei kontinua halo teste ba aplikantes sira,.hahu husi dader too loraik, tanba teste nee sei remata iha dia 17 fulan ida nee.
Nunee mos Paulo de Jesus Magno hanesan aplikantes, eis manorin kontratu 2023 dehan, aat liu teste ida nee vaga ba bolsu kandidatu, kuandu liu sai fali kandidatu profesor, afinal tinan barak ona sai ona profesor.
“Ami bele tuir teste, bele mos la tuir teste, tanba foin hatama deit dokumentu balu esklui no balu kategoria la liu, test ida nee laos valoriza ami ou solusaun ba ami nia problema, teste ida nee Ministeriu Edukasaun nia planu, ami labele halo tan protestu ou asaun. Pesoal hau bele tuir teste, maibe ami presiza tur hamutuk,” dehan nia.
(jac)
