DILI, STLTIMORLESTE.com – Governu Australia apoiu liu husi Programa Kooperasaun Defeza (DCP) entrega Sentru Internamentu ba Komando FALINTIL – Forsa Defeza Timor Leste (F-FDTL), hodi uza ba serbí veteranu no militar sira neebe hasoru kondisaun saude.
Tuir Xefe Estadu Maior FALINTIL- Forsa Defeza Timor Leste (F-FDTL), Tenente Jeneral Domingos Raul “Falur Rate Laek” hatete, instalasaun Klínika Militár. Aktu ida neebe simboliza tan marku ida neebe labele hamoos iha parseria estratejiku neebe sólidu no frutuozu entre Timor Leste no Austrália neebe apoiu fornese liu husi DCP kontribui ona iha dalan estrutural hodi hakbiit Forsa Defeza.
“Hau rekonhese ho agradesimentu ba Embaixadora Austrália nian ba ninia vizaun no kompromisu diplomatiku hodi hametin ita nia relasaun bilateral,” hatete Xefe Estadu Maior FALINTIL- Forsa Defesa Timor Leste (F-FDTL), Tenente Jeneral Domingos Raul “Falur Rate Laek” ba jornalista sira liu husi diskuru iha ambitu serimonia entrega Sentru Internamentu iha Sentru Instrusaun Komandante Nicolau Lobato (CICNL) Metinaro, Sesta (31/07/2026).
Tenente Jeneral Falur Rate Laek hatoo liafuan apresiasaun espesiál ba Adidu Defeza no Xefe DCP no mos ba nia ekipa tomak, enjeñeiru militár australianu no espesialista médiku sira, neebe sira nia rigor tékniku no dedikasaun halo realizasaun infraestrutura ida nee sai posivel.
Nia tenik, Sentru Internamentu ida nee hatán ba nesesidade urjente. Sei hamriik nuudar espasu esperansa no dignidade nian.
“Foka liu-liu ba serbí ita nia veteranu FALINTIL, mane no feto neebe fo buat hotu ba sira nia rain no neebe ohin loron, iha estatutu rezerva ka reforma, hasoru kondisaun saude neebe vulneravel neebe ezije kuidadu kontínuu no espesializadu,” nia esplika.
Nia deklara, estrutura fízika, emprendimentu ida nee konstitui katalizador fundamental ba funsionamentu efetivu Sistema Saude Militár nian, dudu konsolidasaun Sistema Forsa Nasional iha ramu hotu-hotu F-FDTL nian. Iha tempu hanesan, sei hametin Sistema Nasionál Saude no fo asisténsia vitál ba populasaun sira iha situasaun dezastre, liu husi asaun sira Kooperasaun Sivíl-Militár (CIMIC).
“Ida nee mos sei sai espasu ideal ba ita nia mediku sira, enfermeiru sira, no espesialista militár sira neebe hetan formasaun iha rai-laran no rai liur, atu ezerse no kontinua hadia sira nia abilidade téknika sira,” nia hatutan.
Maibe, efikasia tomak husi projetu ida nee presiza asaun neebe koordenadu no lalais. “Nunee hau hatoo apelu makaas ida ba Ministériu Defeza, Ministeriu Saude no autoridade kompetente sira seluk atu koordena esforsu sira hodi permite asinatura Memorandu Entendimentu lalais, nunee mos aprovasaun ba Estatutu Klínika Militár no nia respetiva sertifikasaun ofisiál ba operasaun,” katak nia.
Nia apela ba sira hotu neebe responsavel no futuru jestor ba instalasaun ida nee atu asegura ho rigorozu ninia prezervasaun no durabilidade, hodi garante inkluzaun ba ninia manutensaun regulár iha planu anuál.
“Hau hafoun gratidaun ba povu no Governu Austrália ba sira nia parseria konstante hodi harii Timor Leste ida neebe seguru no reziliente liu,” nia koalia.
(jen)
