DILI, STLTIMORLESTE.com – Reprezentante husi Sentru Audiovizual Max Stahl (CAMSTL) relata patrimonia audiovisual no infraestrutura no instalasaun foun ba Prezidente Republika (PR), Jose Ramos Horta.
Bainhira remata hasoru malu reprezentante husi Sentru Audiovizual Max Stahl (CAMSTL) reprezentante CAMSTL Eudisito Pinto ba jornalista iha palasiu Prezidensial Nicolau Lobato Bairo Pite, Segunda (18/05/2026) hatete, hasoru malu ho Prezidente Republika JoseRamos Horta hodi diskute konaba nesesidade urjente atu reabilita fasilidade neebe proteje istoria audiovizual uniku no folin-boot Timor Leste nian.
Nia hatete PrimeiruAmi relata situasaun ka servisu Sentru Audiovizual Max Stahl nian, neebe hanesan patrimoniu audiovizual Timor-Leste nian. Segundu relata mos konaba relasaun ho infraestrutura ka instalasaun foun ba Sentru Audiovizual Max Stahl.
Iha enkontru nee reprezentante CAMSTL hatoo relatoriu ba Xefe Estadu kona-ba kondisaun fíziku husi arkivu atual neebe komesa aat ba daudaun. Rekonese situasaun krítiku fasilidade nee nian Prezidente destaka nesesidade imediata atu proteje patrimoniu nasional vital ida-nee neebe rai identidade kultural no memoria istorika povu Timor nian.
“Ami sente hanesan onradu tebes bele halo enkontru ho Sua Exelensia Prezidente Republika ba loron ida ohin. Objetivu husi ami nia sorumutu ohin, ami relata buat rua, PrimeiruAmi relata situasaun ka servisu Sentru Audiovizual Max Stahl nian, neebe hanesan patrimoniu audiovizual Timor-Leste nian, Segundu Ami relata mos kona-ba relasaun ho infraestrutura ka instalasaun foun ba Sentru Audiovizual Max Stahl. Ida neebe iha Sua Exelensia rasik haree ona fatin Sentru Audiovizual Max Stahl ida neebe agora iha kondisaun neebe aat. Entaun ita iha hanoin atu hakarak reabilita fali fali sentru Sentru Audiovizual Max Stahl atu bele rai nafatin ita nia patrimoniu, ita-nia kultura, no mos ita-nia identidade sira iha Sentru Audiovizual Max Stahl,” katak nia.
Nia hatete Prezidente iha komitmentu atu bele apoiu instalasaun foun ida nee. Neebe Agora komesa iha mos tekniku sira hodi halo enkuadramentu ida para bele ba hasoru malu, bele koalia kona-ba espesifiku liu oinsa bele reabilita iha tempu besik. Tanba Sentru Audiovizual Max Stahl hanesan ema hatene katak nee hanesan sentru audiovizual neebe uniku, no mos kondisaun ida neebe la diak ba rai nafatin patrimoniu ida nee.
“Agora daudaun iha ita nia tekniku sira hetan apoiu husi Maun Flavio Miranda, neebe hanesan enjeneiru ba projetu ida nee. Ita nia ema neebe mak sei halo servisu nee kompana husi Timor-oan sira, mais dezenu rasik husi Maun Flavio mak halo. Agora daudaun, ita iha ona kompania sira neebe mak atu halo servisu nee. Depois de Prezidente iha ona informasaun neebe pozitivu katak ita bele halao ita sei komesa halo ona iha tempu besik,” katak nia.
Nia haktuir tan katak, Prezidente sei koalia ho parte Governu. Depois de iha ona konkordansia ruma, mak haree apoiu nee mai husi Governu ka apoiu husi prezidente. Maibe felizmente, buat neebe agora iha mak resposta pozitivu no komitmentu husi Prezidente nian hodi kontinua apoiu ba instalasaun ida nee.
Atu hatan ba situasaun nee Prezidente Ramos-Horta espresa ninia kompromisu atu apoia konstrusaun instalasaun foun ida ba CAMSTL iha tempu badak nia laran. Avaliasaun teknika sira lao daudaun ona atu asegura prosesu reabilitasaun neebe lalais. Dezenhu husi projetu nee lidera husi arkitetu Flavio Miranda no ezekusaun sei halao husi kompania timoroan sira. Prezidente fo benvindu ba pasu inisial sira-nee no garante ba delegasaun katak enkontru tekniku sira sei sai prioridade hodi aselera projetu nee.
Atu garante ezekusaun ho susesu husi reabilitasaun urjente nee Prezidensia Republika sei koordena ativamente ho Governu hodi asegura fundu neebe presiza. Maski apoiu finanseiru nee mobiliza diretamente husi Gabinete Prezidensial ka liusi kanal Governu nian Prezidente Ramos-Horta asegura ho metin ba ekipa CAMSTL katak Estadu komprometidu tomak atu prezerva legadu Max Stahl no istoria Timor-Leste nian ba jerasaun sira tuirmai.
(eme)
