DILI, STLTIMORLESTE.com — Demora iha aprovasaun proposta lei salariu minimu husi Governu kontinua fo impaktu negativu ba moris diak povu nian, liu-liu ba trabahador sira iha setor privadu no publiku.
Alerta nee hatoo husi Observador Ekonomia, Silvino Morais, nuudar resposta ba pedidu husi Bankada Partidu Frente Revolusionariu Timor Leste Independente (FRETILIN) iha Parlamentu Nasional (PN), neebe husu Ministeriu Kordenador Asuntu Ekonomiku (MKAE) atu aprezenta lalais proposta lei nee ba Konselhu Ministru.
Silvino Morais sublina katak, kestaun salariu mínimu mak asuntu ida neebe presiza atensaun urjente tanba kustu moris nian sae daudaun, enkuantu rendimentu trabahador sira nian sei iha hela nivel neebe hanesan.
“Demora iha lei salariu mínimu afeta direta moris diak povu nian. Tempu ona governu toma asaun lalais no lori ida nee ba Konselhu Ministru hodi evita dezigualdade neebe kle’an liu tan iha merkadu trabalhu,” tenik Silvino Morais ba STL, Sesta nee (31/07/2026).
Silvino hatutan tan katak, se Governu kontinua lori tempu kleur iha prosesu nee, nia sei hamosu duvida husi komunidade trabahador nian no estraga harmonia sosial iha rai laran.
Iha parte ketak, Trabalhaor José da Silva neebe servisu iha setor privadu balu iha Dili laran hatete katak, sira moris ho susar tebes loro-loron tanba salariu neebe simu la tuir kustu moris neebe sae makaas, hodi husu governu atu lalais aprova lei salariu mínimu hodi salva moris trabahador nian.
“Hau hanoin katak Governu no parseiru sosial sira tenke tuur hamutuk ho konsiensia hodi rona povu nia lian, tanba kada loron neebe liu ho salariu neebe menus fo ona impaktu neebe todan ba familia kiik sira nia futuru, iha kapital Dili no munisípiu sira,” dehan nia.
Entretantu Deputadu Bankada FRETILIN, Antoninho Bianco husu ba Governu liu husi Ministeriu Koordenador Asuntu Ekonomiku (MKAE) atu aprezenta lalais proposta lei salariu minimu ba Konselhu Ministru hodi diskute
“SEFOPE mai iha Komisaun D dehan aprezenta ona ba Ministeriu Koordenador Asuntu Ekonomiku no agora kabe ba Governu mak tenke aprezenta propota lei nee ba Konselhu Ministru, depois mak se aprova ona iha Konselhu Ministru nee bele envia mai Parlamentu atraves Prezidente bele abaisu ba iha Komisaun. Se Komisaun D ok, Komisaun konjunta ok para atu bele haree asuntu salariu minimu,” dehan Deputadu Antoninho.
(car)
