BAUCAU, STLTIMORLESTE.com – Deskonfia Ministeriu Agrikultura, Pekuaria, Peskas no Floresta (MAPPF) laiha vontade atu prevene aninal asu, busa no lekirauk husi virus rabies iha Munisipiu Baucau, tanba Servisu Munisipal Agrikultura Baucau relata ona pedidu dala rua husu vasina iha fulan Abril tinan nee, maibe seidauk koloka vasina no atual asu neebe pozitivu ba virus rabies iha Baucau atinji ona 10 resin.
Tuir dadus neebe STL asesu, husi loron 07 Abril tinan nee too Maiu loron 18 nee, asu neebe afeta ona ba virus rabies iha Baucau hamutuk 18 rejistu iha Postu Administrativu Baucau Vila no Vemasse, iha neebe kada loron update liu husi sistema vizilanjia ba Nasional.
Maibe antes iha loron 09 Abril tinan nee, Departementu Pekuaria Veterinaria liu husi Diresaun Servisu Munisipal Agrikultura Baucau, relata ona pedidu ba Ministeriu Agrikultura Pekuaria Peskas no Floresta iha Nasional, bazeia ba total populasaun animal asu iha Postu Baucau Vila pur-volta rihun 38, atu Ministeriu liu husi Diresaun Nasional koloka vasina asu nian ba Munisipiu Baucau, maibe too laiha resposta foti asaun emiadata.
Tanba nee, iha 23 Abril Departementu Pekuaria Veterinaria liu husi Diresaun Servisu Munisipal Agrikultura diriji pedidu ba Autoridade Munisipiu Baucau hodi solizita ba iha Ministeriu Administrasaun Estatal (MAE) hodi enkanina ba MAPPF, maibe mantein laiha rezultadu too ohin loron.
“Pedidu nee ita hatoo tiha ona iha Abril nia laran, maibe aimoruk seidauk too mai,” hateten Diretor Servisu Munisipal Agrikultura Baucau, Agostinho Ximenes ba STL iha nia knaar fatin Vila Nova Baucau, Segunda (18/05/2026).
Diretor nee rekonhese, atual asu neebe pozitivu ona ba virus rabies iha Baucau liu ona 10 no preokupa kondisaun nee, tanba bele fo impaktu ba komunidade sira bainhira asu pozitivu virus rabies tata komunidade.
Agostinho argumentu, razaun vasina ba asu atu prevene transmisaun virus rabies parte Nasional seidauk koloka ba Munisipiu Baucau, tanba parte Nasional nia atendimentu ba Munisipiu hotu.
“Maibe ita la hatene sira tau planu ga lae nee mos ita labele hatene, tanba ita so halo pedidu deit, sira nia planu tau orsamentu ba raiva nee ga lae ita seidauk hatene,” Diretor nee katak.
Agostinho Ximenes komenta, mezmu vasina asu nian seidauk too iha Munisipiu Baucau, maibe hanesan dirijente Munisipal nafatin tenta liu husi meius komunikasaun oin oin, nunee Ministeriu bele responde, tanba virus refere perigozu.
Tanba nee husu Autoridade lokal sira koordena ho komunidade sira hodi kesi asu iha fatin, nunee bainhira alokasaun vasina too iha Baucau ekipa sira halao deit ona vasina.
Enkuantu asu hamutuk 18 neebe afetadu virus rabies nee, ekipa veterinaria asegura ona.
(tom)
