DILI, STLTIMORLESTE.com – Jurista Timoroan konsidera servisu neebe Sekretariu Estadu Asuntu Toponimia no Organizasaun Urbana (SEATOU) halo viola Direitu umanu ema nian, tanba sidadun hotu-hotu iha direitu ba propriedade.
“Despeju administrativu neebe SEATOU halo nee viola ona direitus umanus ema nian, tanba ita hatene katak Estadu Timor Leste mos ratifika ona konvesaun internasional lubuk ida, iha artigu 17,” dehan Jurista Sergio Dias Quintas ba STL iha Kaikoli, Dili, Sesta nee (10/1/2025).
Nia hatutan, husi konvesaun nee dehan katak sidadaun hotu-hotu iha direitu ba propriedade. Atuasaun SEATOU nee viola mos direitu labarik nian, tanba halo labarik sira trauma no haketak sira husi sira nia ambiente, nee kontra ona prinsipiu iha konvesaun kona-ba direitu labarik nian neebe Estadu Timor Leste mos ratifika.
Tanba lei numeru 1/2003 iha artigu 7 ho 8 dehan katak, antes SEATOU ka Ministeriu Justisa halo despeju nee, tenki notifika okupante sira uluk para sira labele lakon sira nia direitu ba reklamasaun no direitu hodi halo impugnasaun judisial, direitu ida nee fundamental tebes tanba liga ba ema nia propriedade neebe ema konstrui ho sira nia kosar been, entaun kestaun ida nee importante tebes ba sidadaun sira neebe hasoru problema sira nee.
Maibe Governu falta sosializasaun no sensibilizasaun nee sei prezudika tebes komunidade afetadu no nee lori risku no kustu boot husi komunidade no Governu rasik, importante mak ba oin, karik SEATOU halo despeju ruma halo aprosimasaun humanu para komunidade sira hatene sira nia direitu no dever, para evita violasaun ba direitu habitasaun.
(ter)
