DILI, STLTIMORLESTE.com – Ministeriu Edukasaun (ME) liu husi unidade kurrikulu nasional entrega hotu ona diploma estudante ba eskola hotu.
Ministra Edukasaun (ME), Dulce de Jesus Soares hatoo kestaun nee ba jornalista sira iha City 8, Manleu, Kinta nee (06/03/2025).
“Tuir informasaun neebe mak hau hetan husi kordenador kurrikulu ME, diploma sira nee agora ita fahe hotu ona ba eskola sira, tanba diploma sira nee ita muda, antes nee Diretor Edukasaun Munisipiu mak asina, maibe agora daudaun ita muda ba eskola sira mak asina, entaun iha fulan ida liu ba eskola hotu foti tiha ona diploma sira nee, entaun agora faze konhesimentu husi eskola sira, ba estudantes sira neebe mak seidauk foti sira nian diploma, infelizmente sira ba foti iha sira nian eskola,” nia afirma.
Nia akresenta, ba estudantes sira neebe mak seidauk foti diploma, nee sira nian diretor eskola mak asina diploma, teknikamente ME iha regras para diretor sira neebe mak iha problema ruma, iha regras para atu jere ida nee.
“Hau fiar katak diploma sira nee kuaze entrega hotu ona iha fulan hirak liu ba, iha informasaun katak eskola barak mak distribui ona diploma ba ita nian estudantes sira, karik iha eskola ida rua mak seidauk distribui,” dehan nia.
(jac)
