DILI, STLTIMORLESTE.com – Ema neebe fiar Jesus iha nia moris tomak sei simu grasa rohan laek iha nia moris tomak, tanba nee laran metin nafatin iha Kristu Jesus.
Lia hirak nee hatoo husi Padre Paul Kerans, SVD ba STL, Kinta nee (30/07/2026) hatete, ema neebe fiar no hela hamutuk ho Jesus sei simu promesa moris rohan laek nia tuir evanjelhu João 3:16.
Padre dehan, refleksaun ba loron Kinta nee, padre foti husi evanjelhu Mateus 13:47-53, husi evanjelhu nee Maromak kompatra nia reinu hanesan rede neebe peskador soe ba tasi laran hodi kaer ikan, no ikus kaer mak ikan diak, ikan kiik sei soe tiha.
Padre dehan, iha evanjelhu ohin nian, Jesus kompara Maromak nia reinu hanesan rede neebe peskador soe ba tasi laran. Rede nee kaer ikan oi-oin, ikan diak no aat. Ikus mai, ikan diak deit mak halibur no restu sira soe tiha.
“Ai-knanoik nee fo hanoin mai ita katak Jesus bolu ema hotu atu sai parte husi ninia isin, igreja, maibe laos membru igreja hotu-hotu mak arepende. Maski nunee, Maromak nia mizerikordia nafatin ba ema diak no aat, hanesan loro matan nabilan ba ema diak no aat (Mateus 5:45). Tan nee mak ita la iha direitu atu rejeita ema ida. Mesmu Jesus rasik la rejeita ema nebe mai hasoru nia (João 6:37),” katak Padre.
Leitura evanjelhu nee mos konvida ema hotu, diak no aat, atu sai parte ba Maromak nia reinu neebe Jesus harii ona. Ida nee signifika katak ema hotu hetan oportunidade hanesan atu arepende. Atu ema hotu hatan ho pozitivu ba konvite ida nee.
“Hanesan rede kaer ikan diak no aat, ita haleu ho ema diak no ema ladun diak. Maibe ai-knanoik nee halo klaru katak sei iha loron tesi lia nian bainhira sira neebe hatan ho pozitivu ba bolu atu arepende no fiar iha Jesus sei hamutuk ho Nia ba nafatin iha Ninia Reinu. Ida-nee maka ami nia esperansa. Ida nee mak ita nia fiar. Maski ita hetan bombardeamentu ho buat aat loron no kalan, ita fiar katak se ita hela iha Jesus, ita sei simu promesa moris rohan-laek nian (João 3:16),” katak Padre.
Padre dehan, husi evanjelhu nee hanorin ema oinsa buka hakbesik aan ba Jesus, no husik buat neebe halo iha moris loron ba loron hodi moris tuir Maromak nia hanorin sira hodi fila ba dalan los, tanba Maromak deit mak hun no rohan laek iha ema nia moris tomak.
(eme)
