DILI, STLTIMORLESTE.com – Eskola Hotelaria no Turizmu Bekora laiha deve husi rental, no too agora konsesoins eskolar seidauk tama, maske iha Tekniku Vokasional (Tekvo) balun tama ona.
Lia hirak nee hatoo husi Diretor Eskola Hotelaria no Turizmu Bekora, Charles F. Guterres ba jornalista STL iha nia knaar fatin Bekora, Tersa nee (27/05/2025).
“Konsesaun eskolar agora daudaun nee eskola tekvo balun sai ona, maibe eskola tekvo ami nian nee seidauk sai ida, bainhira sai ona nee sura husi diresaun ensinu tekvo kontaktu ami, nee duni too agora ami hein hela, tanba tuir informasaun katak transfere osan ida nee fazeadamente, eskola tekvo balun mak hodi kalan hau asesu informasaun balun nee iha tekvo barak mak hetan ona, maibe ami nian mak seidauk, ami too agora la deve rental ruma, nee duni ami laiha deve, neebe kona-ba konsesaun eskolar nee eskola hein deit,” nia afirma.
Nia hatutan, tuir informasaun neebe mak iha katak, iha tekvo lubuk ida hetan ona konsesoins eskolar, maibe Munisipiu Dili nian tekvo haat nee mak too agora seidauk hetan konsesoins eskolar, maibe sekundariu jeral sira nian tama hotu ona, tekvo nee balun tama ona balun seidauk tama.
Nunee mos,Diretor Nasional Ensinu Sekundariu Tekniku Vokasional, Fernando Mouzinho Gama dehan, konsesoins eskolar ba tekvo nee sei distribui ba eskola tolu nolu, ba eskola publika, nomos ba eskola privadu sira neebe sei fo apoiu ba sira, maibe eskola tekvo publiku nee agora prosesu nee lao hotu ona, hein prosesu ba iha pagamentu ninia, maibe tekvo privadu hanesan tekvo Mau Mali Maliana, orsamentu tama ona sira nian konta bankaria, ba eskola tekvo hetan subvensaun publika hanaran fundu operasional eskolar nee, fundu ida nee tinan ida nee implementa ba eskola lima, tekvo ida iha Atabae, tekvo iha Leorema, tekvo iha Vikeke no eskola rua agrikultura neebe uluk MAP mak kaer, nee Laos konsesoins eskolar.
“Atu informa iha nee katak, konsesoins eskolar neebe Ministeriu Edukasaun iha, iha tinan kotuk ita nian orsamentu nee sempre tau iha kategoria tranferensia publika, nee signifika katak orsamentu nee ita bele halo transferensia direita ba konta bankaria eskola sira, tanba ida nee vantajen boot ida ba Ministeriu Edukasaun, liu-liu ba tekvo katak konsesoins eskolar ba tekvo nee ita fahe ba kategoria rua, ida mak konsesoins eskolar, ida fali bolu fundu operasional eskolar, ida nee mak ita tau iha ita nian eskolar,” dehan Fernando.
Nia dehan, parte finansas atu halo pagamentu iha fulan nee, se lae fulan oin mak halo pagamentu total, konsesoins eskolar nee estudantes ida hetan dolar rua, ida nee tama hotu ona, hein iha pagamentu ninia, nee duni konsesoins eskolar no fundu operasional eskolar nee lao hotu ona ba finansas nian.
(jac)
