DILI, STLTIMORLESTE.com – Hospital Nasional Guido Valadares (HNGV) daudaun nee preparadu ona hodi hein eventu jogu Comunidade dos Países da Lingua Portuguesa (CPLP) 2025 iha Timor Leste (TL), maske too agora seidauk enkontru ho ekipa komisaun Tékniku Apoiu (CTA) husi CPLP.
Diretor Servidu Diagnostiku no Terapeutiku iha HNGV, Vidal de Jesus Lopes dehan, HNGV iha ona preparasaun sistema hodi halo atendimentu ba atleta sira neebe mak monu ba situasaun tohar ka kanek durante iha eventu desportu nia.
“Tanba ema mai ita nia rai presiza preparasaun saida mak ita bele prepara, no sira la mai enkontru mos sistema iha hela para bele responde, karik ema monu ba situasaun tohar ka kanek ruma durante halo atividade desportu, hospital prontu, mais presiza enkontru para teknikamente ita bele ajusta ita nia preparasaun,” hatete Vidal ba jornalista sira iha nia knaar fatin HNGV, Bidau, Kinta (06/03/2025).
Nia informa, ekipa CTA husi CPLP too agora seidauk enkontru ho Konselhu Diretivu HNGV, atu parte HNGV presiza prepara saida-saida hodi bele responde ba eventu desportu nee.
“Klaru katak ami enkontru lai ho sira para parte HNGV nee presiza prepara saida-saida, karik atleta sira nee monu ba situasaun tohar ruma ga, nee ami presiza halo saida. No kona-ba sistema saude ami iha ona, mais ita presiza enkontru tekniku sira tanba ita uma nain presiza preparasaun diak hodi hatudu imajen diak ba paizes luzofonia sira hanesan CPLP,” nia deklara.
Nunee antes nee husi CTA husi CPLP haruka karta ba HNGV hodi realiza enkontru kona-ba preparasaun eventu jogu CPLP 2025 iha Timor Leste, maibe too agora seidauk enkontru.
“CPLP manda duni karta mai atu enkontru ho parte HNGV maibé ekipa seidauk mai, ami hein hela para enkontru kona-ba linha koordenasaun, maibé ekipa seidauk mai atu enkontru ho ami,” koalia.
Antes nee Visi Ministru ba Fortalesimentu Institusional Saude, Jose dos Reis Magno esplika, kona-ba pesoal saude hira mak atu koloka ba iha jogu CPLP nee sei hein Komisaun Organizadora atu relata ba sira, kona-ba atleta no ofisiais sira nia fatin atu deskansa no mos kada hotel nain hira mak hela ba, hafoin destaka pesoal saude ba iha neeba.
“Ba ita la iha problema, tanba durante vizita Amu Papa nia ita hotu akompanha katak Ministériu Saude laos mesak, maibe servisu hamutuk ho Organizasaun Nasoens Unidas no mos parseiru sira CVTL rasik. Ita servisu hamutuk, forsa sira nee ita sei tau hamutuk hodi koloka iha hoteis sira no mos pontus-pontus neebe mak atleta sira sei ba realiza jogu sira nee. Importante ami hatene tiha fatin sira ne’e, ita prontu,” nia hatutan.
Governante nee hatete tan, kona-ba fasilidade saude sira nee laos buat foun ida ba Timor Leste, katak ema mai mak foin loke fali, nee lae, agora estabelesidu hela, neebe parte Ministeriu Saude fo deit informasaun ba sira para bele iha atensaun diak liu tan durante jogu CPLP nee lao.
“Ita nia sentru sira iha Dili nee mos preparadu hela. Profisional saude no voluntariu sira sei apoiu servisu iha ekipa tékniku para bele tau matan ba ita nia atleta sira,” katak nia.
Nia dehan, ambulansia nee sei koordena ho dirijenti husi instituisaun privadu ka publiku sira neebe iha Dili nee hotu, tanba nee parte Ministeriu Saude nee prontu no fasilidade sufisiente.
(jen)
