DILI, STLTIMORLESTE.com – Joven mak futuru nasaun, tanba nee hadook aan husi hahalok krime, buka halo buat neebe diak hodi fo benefisiu ba aan no nasaun.
Lia hirak nee hatoo husi Legios ba madre SSpS, Laura de Sousa Carvalho neebe halao knaar iha Ministeriu Petroliu no Rekursu Minarai (MPRM) ba STL, Kinta nee (30/07/2026) husu joven sira kontinua estuda tanba nasaun nee ba oin presiza mos foinsae sira nia kontribuisaun tanba nee prepara aan halo buat diak hodi benefisia ba aan no ba nasaun hadook aan husi hahalok aat.
Legios ba Madre SSpS husu joven sira atu konvida Maromak horik nafatin iha moris loron ba loron, nunee bele guia ema idak idak ba dalan neebe los, se bainhira joven sira nomos ema hotu nia esforsu lao ho Maromak buat hotu sei lao ho diak.
“Mensajen ba doben foin sae sira, keta baruk hodi estuda no aprende barak, no badinas buka dalan neebe fo benefisiu ba ita nia futuru neebe diak liu no keta haluha konvida Maromak hodi Proteza no lao hamutuk ho ita,” dehan nia.
Iha biban nee nia mos husu foinsae sira katak fo ulun estuda no buka hadok aan husi hahalok krime sira nee.
“Husu hau nia maluk joven timor laran tomak ho domin no hakuak hakarak hatoo mensagem ba ita hotu katak hadook aan husi hahalok krimi sira agora, tempu ida produktivitas ou kreativu kria netik buat ruma hodi nia rejultadu ba ita nia iha aban bainrua nian obrigado,” katak nia.
Nunee mos Prezidente Rede Feto Timor Leste Zelia Fernandes hatutan nasaun ba oin presiza ema hotu nia kontribuisaun husi joven feto no mane ema ho defisiensia no seluk tan, tanba nee hakarak inklina aan ba prosesu dezenvolvimentu rai no nasaun ida nee presiza kapasita aan.
“Presiza kapasita aan liu husi formasaun sira, hodi bele hasae konhesimentu diak liu tan, bainhira kapasidade iha ona husu atu inklina aan iha atividade sira hotu labele moe atu kompete,” dehan Prezidente Rede Feto TL.
Nia hatutan, halao estudu iha nivel formal nee importante maibe buka atu partisipa husi Non Formal sira iha liur nunee bele aumenta ema idak idak nia kapasidade, estuda nee laharee ba idade, laharee ba seksu, tanba nasaun ba oin presiza ema neebe matenek hodi lori rai nee ba oin.
Nunee mos Padre Paul Kerans, SVD husu ema hotu bainhira halao atividade ruma iha moris loron-loron keta haluha konvida Maromak atu moris hamutuk, bainhira halao buat hotu ho Maromak mehi no hakarak sira neebe sai imposivel bele sai posivel.
Padre hatutan tan katak, Maromak mak hun no nain ba buat hotu, tanba nee bainhira halao atividade ruma husu atu akompanha nafatin, maibe kuandu ema halao estudu halao atividade seluk mak haluha Maromak iha moris ida nee luta neebe laiha valor.
(eme)
