DILI, STLTIMORLESTE.com — Kapela Saun Miguel Arcanjo Surikmas iha sarani barak mak partisipa misa, maibe problema boot ida mak kapela nee laiha padre destakamentu permenante ida hodi prezide misa ba sarani sira.
Iha loron boot hanesan paskua foin daudaun, sarani sira iha kapela nee depende ba padre sira husi Seminariu Maior Fatumeta, kuandu padre husi seminariu nee iha tiha ajenda ba prezide misa iha fatin seluk, sarani Surik Mas tenke buka amululik sira husi fatin seluk neebe iha posibilidade atu bele prezide misa.
Hanesan akontese iha misa paskua Domingu ressuresaun nian, tuir orariu misa iha kapela Surikmas hahu iha tuku 8 dadersan, maibe tanba amu laiha, sarani sira tenke hein too tuku 9 foin hahu misa no remata iha tuku 11 meudia.
Tuir Etelbina da Costa katak, avizu neebe fo sai iha misa iha Sabadu kalan, katak misa Domingu resurreisaun nian sei hahu tuku 8 dadersan, maibe iha Domingu dadersan liu tiha tuku 8 sarani sira nakonu iha igreja, akulitus sira preparadu, maibe laiha padre atu prezide misa. Husi tuku 8 too tuku 9 foin iha avizu husi organizador sira husu sarani pasiensia hein, tanba amu seidauk iha.
“Ami rona avizu amu neebe prezide misa iha Sabadu kalan nee atu finaliza misa paskal nian too remata, maibe iha Domingu nee amu nee la mosu, ami hein too tuku 9 foin iha amu, sim ami agradese tebes, tanba bele tuir misa paskua nian,” hatete Etelbina.
Nia informa, kapela Surikmas antes nee iha amu destaka permanente, hanesan amu Lito no amu Olan, mas depois nee amu Lito ba tiha Kapela Hospital Nasional Guido Valadares, troka ho amu Olan depois amu Olan muda ba Kapela Metinaro, sarani Kapela Surik Mas laiha bibi atan, misa Domingu tenke sai hanesan pengemis.
“Ami la hatene problema nee saida mak kapela Surikmas laiha amu, serake amu mak la too atu destaka permanente iha kapela Surikmas ou tanba interese internal balu entre amu sira ho amu parokia,” dehan Etelbina ba STL iha areador Kapela Surikmas, Domingu, (5/4/2026).
Nia dehan, Kapela Surikmas iha Amu Lito nian rame los ho atividade sosial sira, nunee mos sarani barak partisipa misa tanba gosta rona amu Lito nia omilia neebe relevante los ho sira nia moris. Mas depois amu Lito muda, kapela nee hanesan lakon tiha figura ida nee atu lidera sarani sira iha fiar nian, joven sira barak halai ses, balu sei ativu maibe pasivu los.
“Igreja nee presiza amu ida hanesan bibi atan atu haree nia bibi sira, kuandu bibi sira lao sala, bibi atan nee mak buka hatudu dalan los ba sira, maibe igreja mak laiha nia figura nee, sarani bilin balan tiha, hanesan bibi karik laiha nain,” Eterbina tenik.
Tuir observasaun STL iha terenu nota katak akontesimentu sarani hein amu iha misa Domingu laos foin akontee iha misa Domingu paskua nee, maibe dalawain mak akontese, sarani Surikmas toman ona ho situasaun sira hanesan nee depois kapela nee laiha amu destekamentu permanente.
Sarani iha kapela nee mos sempre agradese tanba bele tuir misa kada Domingu, apezar laiha amu permanente, estrutura kapela nian sempre esforsu buka amu ida bele prezide misa, tanba sarani husi kapela nee mai husi bairu hira kedas neebe hela besik kapela, hakarak tuir misa iha kapela neebe besik.
Tanba nee mak bainhira laiha amu, sarani sira hein ho pasiensia, hanesan akontese iha Domingu nee, maske liu tiha oras, sarani sira la book an husi sira nia tur fatin, mantein hodi hein amu ho orasaun iha laran, bainhira amu ida tama ba areador kapela, sarani sira sente kontente, tanba bele tuir misa paskua nian.
(god)
