DILI, STLTIMORLESTE.com — Komunidade Munisipiu Ainaro, ezije Governu atu hadia estrada Builiko neebe kleur ona aat, tanba komunidade sente seguru liu bainhira liu husi estrada Builiko duke estrada Bolmeta neebe risku ba asidente, tanba inklinasaun makaas liu.
Tuir Cipriano Soares, estrada Builiko kleur ona aat, kauza husi rai halai, rasta estrada isin lolon tun, nunee mak governu halo estrada Bolmeta nudar estrada alternativa ba komunidade bele halo movimentu. Maibe estrada Bolmeta risku tebes, tanba nia inklinasaun ka tanjakan makas los.
“Ema husi Ainaro tun ba kasa nee diak hela, tanba estrada Bolmeta kaber, mas husi kasa sae mai Ainaro, prefere liuhusi estrada Builiko neebe aat grave duke liu husi bolmeta estrada diak, tanba risku ba asidente,” dehan Cipriano ba STL iha Ainaro, Domingu (29/3/2026).
Cipriano dehan, kauza husi udan boot neebe akontese iha tinan hirak liuba, rezulta estrada Builiko aat grave, tanba rai halai, rasta estrada isin lolon tun pur volta metru 100, maibe too agora seidauk hadia, maske estrada Builiko nudar dalan alternativu ba komunidade.
“Bis sira husi Suai ba Dili, sempre liu husi estrada Builiko, sira la brani liuhusi estrada Bolmeta, kareta neebe liuhusi dalan bolmeta nee so kareta governu nian ho kondisaun diak, kondisaun aat, la barani,” dehan Cipriano.
Komunidade nee dehan, tempu ona governu tetu atu hadia estrada Builiko, tanba estrada nee aat kleur ona, ema barak gosta liu husi estrada nee duke estrada foun Bolmeta.
“Ita hare estrada nee nafatin hela deit, kareta fuzu boot sira liu mos laiha mudansa, signifika rai metin ona, tempu ona reabilita para fasilita ema lao ba mai,” komenta Cipriano.
Tuir observasaun STL iha terenu nota katak, estrada Builiko maioria diak, maske iha kuak barak, tanba kleur no laiha manutensaun, estrada nee mos klot, susar tebes ba kareta rua atu ses malu. Bainhira iha kareta ida liu, kareta ida seluk tenke buka espasu neebe iha hodi sees, tanba kareta rua labele ses malu.
Iha parte estrada neebe aat tanba kauza husi rai halai, iha tempu udan labele liu, tanba namdoras, kuandu kareta ida mak derepenti aat iha nee, presiza intervensaun husi bombeirus, ho kareta boot sira bele rasta sai.
Iha fatin nee dalawain mosu engarafamentu, liu liu kareta no motor sira neebe laiha kondisaun atu liu husi dalan bolmeta nian neebe nia inklinasaun makas tebes.
Dalan Builiko dalan antigu, iha dalan nee mak bele hasoru animal fuik hanesan lekirauk ho modelu oin oin hanesan mendigo neebe hamrik hela iha Estrada hodi hein ema nia tulun, animal sira nee mos dalaruma korta kareta no motor neebe liu hodi hetan atensaun. Mas kuandu mosu engarafamentu, ema barak tun husi kareta lao ba mai iha estrada, lekirauk sira nee halai ses hotu tanba tauk.
(god)
