DILI, STLTIMORLESTE.com – Ba dahuluk dezde era independensia, Komunidade Kristaun Timor Leste (TL) realiza konferensia internasional Transforma Timor Leste ho tema “Transforma Sosiedade liu husi Evanjelhu no Poder Esperitu Santu”.
Prezidente Komisaun Organizadora, Antonio Oliveira de Carvalho nuudar mos Pastor iha Igreja Misaun de Cristo Timor Leste informa katak, Konferensia Internasional Transforma Timor Leste durante loron rua, 27-28 Marsu 2026, iha Ginaziu Desporto de Dili.
Tuir nia, objetivu husi konferensia internasional Transforma TL nee ho intensaun atu kapasita líderansa igreja, emprezariál sira no edukadór sira ho mos juventude sira atu lori transformasaun sosiál liuhosi Evanjelhu Jesús Kristu nian no kbiit Espíritu Santu nian iha sira-nia kontestu profisionál no sosiál.
“Objetivu konferénsia internasional ida-nee ho intensaun atu kapasita líderansa igreja, emprezariál sira no edukadór sira ho mos juventude sira atu lori transformasaun sosiál liuhosi Evanjellu Jesús Kristu nian no kbiit Espíritu Santu nian iha sira-nia kontestu profisionál no sosiál,” dehan Antonio Oliveira de Carvalho.
Konferensia internasional nee offisialmente loke husi Ministru Justisa, Dr. Sergio de Jesus da Costa Fernandes Hornai neebe reprezenta Vise Primeiru Ministru no Ministru Koordenador Assuntu Sosial, Eng. Mariano Assanami Sabino.
Iha nia intervensaun, Dr. Sergio Hornai nee hateten, tema jeral konferensia Transforma TL nee tuir duni prinsípiu universál no objetivu dezenvolvimentu nasionál.
“Ita hotu hatene katak kreda laós deit fatin atu reza, maibé mós eskola ida neebé hanorin ita atu ajuda malu. Evanjellu jezús kristu nian haktuir katak Imi hadomi malu, nudar hau mos hadomi imi,” dehan Ministru Justisa nee hodi hatutan iha TL, lia-fuan sira-nee laós deit koalia, maibé sai faktu neebé haree loron-loron no moris iha komunidade nia fiar katólika nian.
Ho prezensa husi lider kreda sira, edukador, setor emprezarial no juventude sira, konferensia nee fanun duni ema hotu, inklui profisaun sira neebe hola prezensa iha konferensia nee atu sai ajente transformador iha ida-idak nia area.
“Hau halo apela ba lider kreda sira, ita boot sira-nia lideransa espirituál mak sai naroman morál ba komunidade barak. Espera katak eventu ida-nee hametin liután ita boot sira-nia kapasidade atu sai ajente ba dame no dezenvolvimentu lokál. Hau apela mos ba setor emprezarial sira, Ekonomia TL presiza líder sira neebé la haree deit ba lukru, maibé nuudar dalan atu kria serbisu neebé dignu no prosperidade ba ema hotu, ho transparénsia no onestidade,” dehan nia.
Tuir nia, transforma TL, laós deit kampaña ida, maibé nee mak bolu ida ba imi-nia determinasaun. Evanjellu Jezús Kristu nian hanorin ema katak lideransa neebé loos mak lideransa neebé serbí, laós lideransa neebé buka deit kadeira ka podér.
Nia mos dehan, Ministériu Justisa sei kontinua asegura katak direitu ba fiar no ninia manifestasaun públika sei hetan respeitu, tanba fiar katak sosiedade ida neebé haburas espiritualidade mak sosiedade ida neebé unidade liu no dook husi konflitu.
Nunee mos, Apóstolu Dr. George Mike Portuphy, Koordenadór Misaun Rejionál sira ba bloku Aziátiku neebé maka sai hanesan oradór no autór konferénsia nian, hateten katak komunidade fiar nian presiza hamriik hamutuk, iha governu nia kotuk unidu hodi kombate sosiedade nia moras sira atu nunee rekonsiliasaun no restaurasaun nasionál bele sai norma ba nasaun boot ida-nee.
“Imi laós nasaun ida neebé define deit hosi nia luta pasadu sira, maibé imi iha pozisaun ba signifikadu profétiku, ho futuru ida iha neebé lideransa neebé loos buras, Maromak nia prezensa hetan onra públikamente no ho kbiit,” deklara Dr. Portuphy.
Aleinde nee, Konselleira matrimóniu iha USA, Dra. Cynthia Adom- Portuphy, neebe sai mos oradór iha Konferénsia Internasionál Transform TL durante nia sesaun hateten katak transformasaun ba nasaun tenki hahu husi uma laran.
“Jesus antes hahu nia ministeriu, Nia hahu husi uma laran. Nunee mós, uma maka espasu ida neebé transformasaun loloos hahú,” dehan Dra. Cynthia Portuphy.
Iha fatin hanesan, Sekretariu Komisaun Organizadora, Evangelisto Gantry dos Santos Meilana nuudar mos Pastor iha Igreja Dili City Church hateten, Dili City Church kontenti bele servisu hamutuk ho igreja Kristaun sira iha TL hodi hamutuk realiza konferensia internasional nee.
“Nudar igreja foun iha TL, ami nia ministeriu lao ho Igreja Pentekosta mundial nian, hamrik iha TL hodi hamutuk no kompleta misaun Nai Jesus nian oinsa lori evanjellu ba ema hotu iha mundu, inklui ba rai doben TL. Prezensa Dili City Church iha TL hodi sai mos ajente transformasaun ba nasaun liu husi misaun Kristu nian tuir vizaun no misaun COP nian,” dehan Pastor Gantry.
Nia hatutan tan katak misaun Kristu nian laos pastor ida nian, igreja ida nian, laos organizasaun ida nian, tamba nee Transforma TL mosu hodi bele halibur hamutuk ajente Kristu sira hodi servisu hamutuk hodi transforma rai TL.
Ho realizasaun konferensia nee, Elder Gantry lori naran komisaun organizadora hato’o agradesementu ba supporta Governu liu husi Ministeriu Juventude, Desporto, Arte no Kultura (MJDAK) neebe apoia ona fatin, no Vise Primeiru Ministru no Ministru Koordenador Assuntu Sosial, Eng. Mariano Assanami Sabino neebe fo ona nia reprezentasaun ba Ministru Justisa, Dr. Sergio Hornai hodi loke offisialmente konferensia internasional nee ho liafuan neebe pozitivu tebes ba kresimentu espritual ba komunidade Kristaun sira iha TL.
“Agradese mos ba Maromak atan sira husi denomisaun igreja oi-oin, ba publiku no sarani Kristaun sira. Espesialmente mos ba Aps. Dr. Eric Nyamekye, Chairman COP neebe finansia ona konferensia internasional nee,” dehan Elder Gantry.
Nunee mos, Julio Kuka nuudar Pastor husi Igreja Vizaun Cristo Baukau husu ba komisaun organizadora atu kontinua konferensia internasional nee iha futuru hodi kontinua reprezenta lian komunidade Kristaun sira iha TL.
“Konferensia internasional nee pozitivu tebes, ida nee maka hau nia hakarak ba igreja Kristaun hot-hotu atu mai ita hamutuk hodi unidade no koalia misaun Kristu nian,” nia dehan.
Konferensia Internasional TTL26 hetan supporta husi the Church of Pentecost Global, no apoia husi igreja lokal sira hanesan IMC-TL, Dili City Church, no JCBC, no reprezentante Pastor sira husi igreja Kristaun oi-oin.
Partisipa mos iha konferensia internasional nee mak Pastor husi Indonezia, India, Singapura, Brazil no Ghana.
(mik)
