DILI, STLTIMORLESTE.com – Konsesoins eskolar ba Ensinu Tekniku Vokasional hahu halo ona pagamentu no balun sei iha prosesu nia laran.
Tuir Diretor Nasional Ensinu Sekundariu Tekniku Vokasional, Fernando Mouzinho Gama dehan, konsesoins eskolar ba tekvo nee sei distribui ba eskola 30, ba eskola publika, nomos ba eskola privadu sira neebe sei fo apoiu ba sira, maibe eskola tekvo publiku nee agora prosesu nee lao hotu ona, hein prosesu ba iha pagamentu ninia, maibe tekvo privadu hanesan tekvo Mau Mali Maliana, orsamentu tama ona sira nian konta bankaria, ba eskola tekvo hetan subvensaun publika hanaran fundu operasional eskolar nee, fundu nee tinan ida nee implementa ba eskola lima, tekvo ida iha Atabae, tekvo iha Leorema, tekvo iha Vikeke no eskola rua agrikultura neebe uluk MAP mak kaer, nee laos konsesoins eskolar.
“Atu informa iha nee katak, konsesoins eskolar neebe Ministeriu Edukasaun iha, iha tinan kotuk ita nian orsamentu nee ita sempre tau iha kategoria tranferensia publika, nee signifika katak orsamentu nee ita bele halo transferensia direita ba konta bankaria eskola sira, tanba ida nee vantajen boot ida ba Ministeriu Edukasaun, liu-liu ba tekvo katak, konsesoins eskolar ba tekvo nee ita fahe ba kategoria rua, ida mak konsesoins eskolar, ida fali bolu fundu operasional eskolar, ida nee mak ita tau iha ita nian eskolar,” dehan Fernando ba jornalista sira iha nia knaar fatin Ministeriu Edukasaun, Sesta nee (16/05/2025).
Nia dehan, parte finansas atu halo pagamentu iha fulan nee, se lae fulan oin mak halo pagamentu total, konsesoins eskolar nee estudantes ida hetan dolar rua, ida nee tama hotu ona, hein iha pagamentu ninia, nee duni konsesoins eskolar no fundu operasional eskolar nee lao hotu ona ba finansas nian.
“Ita hein katak eskola sira bele hetan osan ida nee hodi halo sira nian atividades, eskola privadu sira mos ita kontinua fo apoiu, bazeia ba sira nian dadus neebe haruka mai, montante orsamentu ba konsesoins eskolar rihun 700 resin, nee ba eskola publiku no privadu,” dehan nia.
(jac)
