MANATUTO, STLTIMORLESTE.com – Labarik sarani Katolika nain 20 resin iha Postu Administrativu Soibada, Munisipiu Manatuto, simu ostia dahuluk no nain lima (5) simu batizmu iha igreja Paroquial Sagrada Coração de Jesus Soibada.
Liu husi omelia Padre Paroku Paroquia Soibada, João Ornai Fernandes haktuir, husi evanjeilhu sira Jesus Kristu haruka nia eskolante sira ba rai sira halo ema moras sira sai isin diak no duni sai diabu sira hodi halo ema kontente iha Maromak nia prezensa. Hanesan mos paroquianu sira iha paroquia Soibada ba reinu Samoro oan sira neebe simu kominaun dahuluk, nuudar knaar ida atu haklaken liufuan Jesus Kristu ba ema seluk.
“Igreja husi neineik ba neineik buras ba daudaun paroquiano aumenta ba daudaun hanesan sira nain lima simu batizmu no sira nain 20 resin simu premeira kominaun, katak igreja Soibada buras ba daudaun,” hateten Pe. João Ornai Fernandes liu husi nia omelia iha misa premeira kominaun neebe realiza iha igreja Paroquia Soibada, Kinta (11/06/2026).
Nia esplika, selebrasaun relijiozu ida nee sai hanesan momentu importante ba Igreja Katolika iha Soibada no marka etapa foun iha moris espiritual labarik sira neebe simu sakramentu sira hakbesik aan liu tan ba Maromak no Igreja.
Paroku Parquia Soibada, Pe. João Ornai Fernandes, husu inan aman sarani Katolika sira iha Soibada atu tau matan ba oan sira nia moris fiar nian no buka banati tuir Sagrada Coração de Jesus, atu sai exemplu diak ba ema seluk.
Nia hateten katak, prezensa ema hotu iha mundu nee hanesan eskolante Jesus nian neebe Maromak bolu atu moris iha haksolok no hametin fiar, laos moris ho egoizmu, odiu, vingansa no laran moras. Tanba halakon hahalok hirak nee, maibe moris tuir deit Jesus Kristu nia hanorin katak, haklaken Evanjelhu ho liafuan hatudu fiar nian tuir kreda, hanesan hadomi Maromak nia sasan no hadomi maun alin sira hanesan ita aan rasik.
“Nee duni oan sira neebe simu Jesus nia futar isin no futar raan ba dala uluk iha imi nia moris. Kumpri imi nia promete no fiar atu fo testemunha ba imi nia inan aman sira neebe ba misa deit bainhira iha selebrasaun boot. Hanorin fali sira atu fila ba Nai nia uma,” hateten Pe. João Ornai Fernandes.
Nia komenta, mensajen ida nee sai hanesan konvite ba inan-aman no komunidade sarani tomak atu hametin vida espiritual iha famalia, hodi sai ezemplu diak ba labarik sira no hamoris kultura orasaun no partisipasaun ativu iha Igreja. Tanba premeira kominaun no baptismu laos deit selebrasaun loron ida, maibe komitmentu ida atu kontinua moris tuir dalan Jesus Kristu no fo testemunha ba ema seluk liu husi hahalok diak no domin.
(tom)
