DILI, STLTIMORLESTE.com – Eis Deputadu husi Partidu Sosial Demokrata (PSD), Leandro Isaac fo kritika makas ba Governu neebe halao eviksaun ka gusur povu nia rai, uma no kios kiik sira neebe sai nuudar fontes moris ba familia barak. Izaac kestiona mos kbiit Estadu nian neebe depende deit ba haruka joven sira ba servisu iha rai liur tanba la iha kampu servisu iha rai laran, inklui sistema justisa neebe aplika deit ba ema kiik no kiak sira, enkuantu ema boot no riku sira justisa la lao.
Preokupasaun no kritika nee faktu duni katak realidade moris povu nian ohin loron nakonu ho terus no susar, bainhira liu liu kbiit ekonomia familia nian harahun tiha liu husi gusur ka distruisaun ba uma no kios kiik sira, enkuantu Governu foti deit kestaun imajen sidade nian hodi foka ba foti naran iha matan ASEAN no CPLP.
Tuir Leandro Isaac asaun neebe Governu halo hasoru kios kiik no uma sira nee fo impaktu boot tebes ba ekonomia familia nian. Kios kiik no uma sira neebe uluk iha tempu Governu da-7 no da 8 neebe konsege salva aan, agora fali mai lakon hotu iha Governu foun nian liman.
“Estadu labele harii deit sidade nabilan ba matan foun bainaka sira nian hodi hanehan fali kbiit laek sira nia moris. Bainhira duni ita nia povu husi sira nia kios no uma, Governu foti tiha ona sira nia moris fundamental. Justisa labele matan delek ba ema riku no matan moris deit ba ema kiik no kiak sira,”kestiona Leandro ba STL, Segunda (18/05/2036).
Nia sente triste tanba Governu neebe lidera husi Primeiru Ministru (PM), Kay Rala Xanana Gusmão fo prioridade liu ba vijaun katak, Governu ho Estadu nia hakarak halo sidade Díli nabilan deit ba bainaka ASEAN no CPLP sira, hodi nunee sira gava deit nai ulun sira. Maibe sira haluha tiha katak povu moris iha mukit, susar no empregu iha rai laran la iha.
Iha parte ketak Isaac kestiona sentidu husi ukun rasik aan se ikus mai Governu nia kbiit mak haruka deit joven mane ho feto sira ba servisu iha rai liur. Nia haktuir katak Governu la fiar aan hodi kria kampu trabalhu iha rai laran, maibe depende deit ba ba oportunidade servisu iha Austrália, Koreia du Sul, Irlandia no Inglatera hodi husik fali situasaun ekonomia iha raí laran naksobu.
“Triste tebes empregu Governu la harii, fiar aan deit ba Austrália, Koreia du Sul, Irlandia no Inglatera. Serake ukun rasik aan hodi haruka deit joven mane ka feto ba servisu iha rai liur no oinsa iha iha rai laran,”dehan nia.
Eis Deputadu iha Primeiru Lejislatura nee mos sublina katak, poder Justisa iha RDTL la funsiona ho loloos. Maski Konstituisaun hakoak prinsipiu fundamental Estadu de Direitu Demokratiku, Iha pratika justisa nee lao deit ba ema kiik no kiak.
Leandro afirma, bainhira lider katuas nos asuwain sira la halo mudansa ba ukun nain, Timor-Leste (TL) sei la lao ba oin, maibe sei hakiduk ba kotuk hanesan pratika durante tinan 26 ukun rasik aan marka pasu deit iha fatin.
Iha parte ketak Akademista UNPAZ, Antônio Soares hatete, dezemvolvimentu no ordenamentu sidade nian importante, maibe labele sakrefika direitu baziku sidadaun sira nian. Nia dehan, antes atu ezekuta orden hodi duni sai povu, Governu tenke prepara uluk lai fatin foun neebe dignu.
“Estadu iis dezenvolvimentu, maibe dezenvolvimentu loloos mak labele husik povu frustradu no kbiit laek iha sira nia rai rasik. Tenke dezenvolve ho fuan no humanu,”dehan Antônio.
Antônio hatutan, asaun gusur povu la ho planu neebe matenek fo impaktu boot tebes ba labarik sira nia futuru, liu liu iha parte edukasaun tanba tenke tuir inan ho aman ba hela iha fatin foun.
(car)
