BAUKAU, STLTIMORLESTE.com – Ministeriu Agrikultura, Pekuaria, Peskas no Floresta (MAPPF) abandona vitima Belina Pedrita Faria neebe hetan kanek, soke husi asidente kareta estadu sapa matrikula 05-469 G, iha area Madoma, Aldeia Betulale, Suku Vemasse, Postu Administrativu Vemasse, Munisipiu Baukau.
Vitima Belina Pedrita Faria aprezenta, iha momentu loron 14 Maiu nee sai husi uma laos lao ba atividade privadu, maibe lao ba preparasaun insaiu drumband ba atividade serimonia nasional 20 Maiu nian, maibe too iha estrada atu ba eskola ensinu sekundaria Vemasse hetan asidente, tanba soke husi karreta estadu refere rezulta kanek iha parte rentos no inus, iha neebe kauze kalan ida iha Hospital Rejional Eduardo Ximenes (HoREX) Baukau.
“Hau sente triste, tanba hau lao nee laos hau nia privadu mak hetan asidente hau baixa too alta mos ema ida nuunka mai haree hau,” Belina Pedrita Faria hateten ba jornalista sira hafoin remata kontrola kanek iha HoREX Baukau, Segunda (18/05/2026)
Vitima nia inan Rita Correia kestiona karreta estadu husi diresaun Ministeriu Agrikultura Pekuaria Peskas no Floresta, neebe soke nia oan rezulta kanek baixa iha HoREX too alta durante halimar iha uma, parte husi Ministeriu refere la marka prezensa hodi vizita vitima too ohin loron.
“Sira soke hau nia oan iha dia 14 lori tan mai Hospital too agora hau lori fali mai hasai digadura sira nuunka mai haree, hau sente triste hau nia oan la eskola,” Inan Rita Correia hateten
Nia haktuir, iha asidente neebe involve husi karreta estadu sapa matrikula 05-469 G, soke ema nain 3, rezulta ida mate, kanek no desmaia, maibe parte vitima ida neebe mate Ministeriu Agrikultura Pekuaria Peskas no Floresta ho familia rezolve ona iha Polisia, enkuantu vitima Belina Pedrita Faria la involve iha prosesu rezolve refere no la hetan atensaun husi Ministeriu refere.
Tanba durante vitima Belina Pedrita Faria baixa iha sala emerjensia HoREX Baukau no alta fila ba uma Vemasse obrigadu tenke aluga karreta mesak, husi Vemasse ba kontrala iha HoREX no fila ba uma Vemasse no kustu seluk tan, familia rasik atende, enkuantu Ministeriu la marka prezensa.
“Ohin ami mai kontrola ba fila mak ami lori ba Polisia, tanba sira la ba haree hau nia oan, hau nia oan sira soke laos monu,” Rita Correia koalia ho emosaun.
Tuir planu vitima Belina Pedrita Faria nia familia sei aprezenta keixa iha Polisia Eskuadra Postu Vemasse ba kazu refere kha loron 18 Maiu nee.
Entretantu too notisia nee publika, STL seidauk hetan komfirmasaun husi Ministeriu Agrikultura Pekuaria Peskas no Floresta.
(tom)
