DILI, STLTIMORLESTE.com – Maria Auxiliadora sai esperansa ba ita hotu, tanba Maria mak lori esperansa los, esperansa neebe lahalo ema laran susar, esperansa la bosok ita no esperansa ninia serteza mak Jesus Kristu rasik.
Iha omilia Vigario Provinsial Salesiano Pe. Manuel Pintu, SDB hatete, ita hotu haksolok tanba selebra festa Maria Auxiliadora iha tinan de grasa tinan Santu, tinan Jubileu ida nee, kuandu rona Sua Santidade Francisco maktoban fo tema espesial ba tinan Jubileu “Somos Peregrinos da Esperança”.
Tanba nee iha Eukaristia Santa ida nee agradese ba Maromak ba figura inan diak no tulun nain neebe Nai Maromak haraik mai ita ba umanidade tomak, Nain Feto ninia prezensa iha planu salvasaun Maromak nian, Nain Feto ninia intervensaun iha kreda ninia istoria ho Nain Feto ninia diak tomak neebe Dom Bosco apresia tebes ligasaun ba ninia moris leno Nain Feto ninia diak tomak iha ema idak-idak nia moris.
“Nain Feto uluk nanain sai ita nia esperansa, Nain Feto mak uluk nanain hatudu esperansa ba ita no esperansa ida nee mak Jesus rasik, iha tinan furak ida nee hamutuk ho Maria nuudar modelu esperansa aseita Maromak nia konvite atu sai Maromak nia inan, Maria mak lori esperansa los mai ita, esperansa neebe la halo ita laran susar, esperansa neebe la bosok ita, esperansa neebe iha ninia serteza nee mak Jesus Kristu rasik,” hatete Vigario Provinsial Salesiano, Pe. Manuel Pinto, SDB liu husi nia omilia wainhira prezide misa Festa Maria Auxialiadora iha Igreja Komoro, Sabadu (24/05/2025).
Maria inan neebe hatudu ba ema no kontinua aprisoes tomak iha Fatima, iha fulan Maiu Maria vizita tama sai uma familia sira riku ka kiak, familia neebé simples, maske Maria kolen maibe nia kontente, tanba hau nia hakarak ita mos sai nia oan neebe diak.
Tanba nee iha fulan Maiu hahu agradese ba Maromak, festa hirak nee labele liu leet deit, maibe husik buat diak ba ema idak-idak liu-liu kontestu iha rai Timor neebe book aan seidauk lao los ema oho malu, defama malu, ema la simu malu.
Pe. Manuel hatete, nuudar Nain Feto nia oan sira, tenke hatudu oinsa Nain Feto nia moris bele influensia iha idak-idak nia diak, iha familia, iha servisu fatin, iha vida politika nomos iha sosiedade.
(Joa)
