DILI, STLTIMORLESTE.com – Materia hotu ho lian português no profesores sira halo esplikasaun ba estudantes ho lian tetum.
Liafuan nee hatoo husi Diretor Ensinu Baziku Sentral (EBC – sigla português) Manleuana, Carlos Correia ba jornalista STL, Kinta nee (22/05/2025).
“Lian português ho tetum nee ami uza hotu iha prosesu ensinu aprendizajen ba ita nian estudantes sira, tanba lingua rua nee ita nian lian ofisial, tanba nee materia hotu ami uza ho lian português, nee duni kada loron profesor sira uza lian rua nee inklui lian inglês, nee duni ita obrigatoriu uza lian rua nee,” dehan nia.
Carlos dehan, aleinde uza lian português ho tetum, maibe uza mos lian inglês, tanba nee uza lian tolu nee mak tetum, português no inglês, nee duni profesor sira hanorin tuir orariu neebe mak iha ona.
“Ita nian profesores sira halo esplikasaun ho lian tetum ba ita nian estudantes sira, ita nian materia hotu ho lian português, ita boot sira hatene katak lian tetum ho português hanesan ita nian lian ofisial,” katak nia.
Iha fatin seluk, Feliciano Gusmao hanesan Profesor husi EBC Fatumeta dehan, materia hotu-hotu uza ho lian português, maibe esplika ho lian tetum, bainhira labarik sira la komprende tenke esplika fali ho lian tetum.
“Ita nian materia hotu-hotu nee ita uza ho lian português, maibe esplika ho lian tetum, bainhira labarik sira la komprende tenke esplika fali ho lian tetum, tanba ita esplika ho tetum para ita nian estudantes sira bele kompriende diak liu tan,” nia afirma.
Nia akresenta, maske materia hotu ho lian português, maibe nuudar edukador sempre halo esplikasaun ho tetum, ho nunee estudantes sira bele kompriende lian tetum ho português hanesan lian ofisial.
(jac)
0 Responses
Hare husi resultado Ida nee, hatudu Mai Ita katak mesmo Governo obriga sidadaun hotu -hotu tenke aprende lingua Portugis maibe realidade hatudu Mai Ita buat seluk Ida. Tanba nee, lingua Portugis la bele sai fali obrigatoriu ba prosesu edukativu no Administrativu iha nasaun Timor Leste, lingua Portugis uja hodi harmonia lingua Tetun. Tanba nee lolos Governo tenke obriga sidadaun hotu -hotu aprende lingua Tetun Laos Lingua Portugis. Lingua Tetun la kompleitu Mak foin uja lingua Portugis hodi halo kompleitu. Governo persisa tradus materia Sira ba lingua Tetun. La bele materia uja lingua Portugis esplika ho lungo Tetun Ida nee problema bot ba jerasaun foun Rai Ida nee Nia.