DILI, STLTIMORLESTE.com – Ministeriu Edukasaun (ME) halo kolokiu hamutuk ho parseiru sira hotu, tantu nasional no internasional hodi halo revizaun ba setor edukasaun 2020-2024.
“Ohin ita halo kolokiu ida hamutuk ho parseiru sira hotu, tantu nasional no internasional halo revizaun ba setor edukasaun 2020-2024, tuir lo-loos ita halo iha 2020, maibe tanba Covid-19, no tinan ida nee mak iha halo revizaun ida ba servisu hotu kedas, depois iha revizaun nian sei fo fali rezultadu mai ita atu dezenvolve planu ba 2026-2030. Susesu nee hau bele dehan susesu barak no dezafiu mos barak, susesu iha 2020 mai oin ita konsege halo aumenta sala de aula no halo formasaun ba profesores sira,” dehan Ministra Edukasaun (ME), Dulce de Jesus Soares ba STL iha edifisiu City 8 Manleuana, Dili, Kinta nee (06/03/2025).
ME Dulce dehan, iha 2020 mai oin nee fo formasaun no profesores sira neebe mak tama iha rejime kareira hamutuk 4 mil ital profesores neebe mak tama iha ingresu ba iha sira nian kareira rejime espesial, sira sai ona funsionariu publiku, maibe iha dezafiu mos barak, maibe tinan-tinan kontinua hadia liu husi halo revizaun kurrikulu, formasaun profesores, fornese livrus.
“Nee duni 2020 sae mai nee ita problema ho Covid-19, labarik barak la tuir prosesu aprendizajen iha momentu neeba, entaun presiza halo fila fali programa sira neebe mak atu bele hadia sira nian prosesu ensinu aprendizajen. Karik hau sura ho susesu nee, hau bele dehan iha barak, maibe iha dezafiu mos barak, dezafiu nee mak ohin hau dehan, sala de aula seidauk too, kadeira meza no livrus seidauk too, maibe Governu ida neebe deit kontinua tau nafatin esforsu atu responde ba situasaun sira nee neineik, maibe beibeik ita kontinua responde,” dehan nia.
Nia hatutan, orsamentu neebe mak ME iha koloka barak liu ba salariu profesores, ida nee mos imoportante, tanba mezmu iha infraestrutura no iha buat hotu, maibe laiha profesores neebe ho kualidade garantidu sira nian salariu hodi halo servisu.
(ter)
