DILI, STLTIMORLESTE.com – Ministru Justisa (MJ), Sergio Hornai hatoo agradese ba Nunsiatura Reprezentante Vatikanu iha Timor Leste, Mgr Marco Sprizzi, tanba selebra ona eukaristia ho rekuzu sira, maibe husu atu Nunsiatura ba iha Vatikanu kontinua reza mai Timor.
“Agradese ba iha Nunsiu neebe hamutuk iha tinan barak, ba ohin loron ida neebe espesial hanesan Katolika sai hanesan tradisaun ida neebe ema Katolika tinan-tinan sempre buka iha nia istoria hodi tau nia fe, atu oinsa halo konverasaun ba fe neebe iha ba Maromak,” dehan Ministru Justisa, Sergio iha Prizaun Bekora, Kuarta (5/03/2025).
Ministru nee hatutan, agradese ba Nunsiu, tanba bele halo misa hamutuk ho ema sira neebe hela iha prizaun nee, ba mos maluk sira neebe tau matan ba iha prizoneru sira, no agradese ba Amu Francisco no mos Amu Kom selebrante.
Iha inisiativa neebe estraordinariu oituan, tanba lori misa ida nee mai besik liu iha prizaun, hamutuk ho ema sira hela iha fatin ida nee, no lori Governu nia naran, hanesan Ministru Justisa, agradese ba esforsu hotu liu-liu ba Aman Maromak neebe bali ita hanesan ema neebe fiar ba Nia, orienta ita atu hamutuk hanesan ema moris.
“Mensajen neebe Nunsiu fo atu hametin ita nia fiar no fe hanesan ema katolika, no maluk sira neebe hela iha Prizaun Bekora iha Gleno no Suai la mesak, maibe Nunciu hamutuk hodi selebra misa hanesan despedida.
Sublina, mensajen importante neebe Nunsiu fo, ema neebe la haree la sente maibe nia fiar, ita sei hamutuk ho Maromak, maske hela iha fatin ida nee, no demonstra kapasidade. No lori Governu nia naran, lori Ministeriu Justisa nia naran, hatoo ona pedidu ofisial ba Nunciu iha Timor Leste, maibe lori Ministru Justisa nia naran agradese ba kolaborasaun neebe iha, iha vizita Amu Papa nian, lori maluk rua iha prizaun ba misa iha Tasi-Tolu hodi reprezenta rekuzu hotu,” hatete governate nee.
Governante nee mos agradese ba Amu Kapelaun, liu husi esforsu atu oinsa lori rekuzu sira reprezenta nain rua ba misa iha Tasi-Tolu, no ikus mai konsege duni, no ida nee esforsu ida mai husi Amu Nunciatura mos, hodi hatoo mos mensajen ba iha Amu Papa atu lori paz dame ho dame mai ita.
“Ami husu nafatin Nunsiu ba iha pozisaun foun iha Vatikanu, atu reza nafatin ba ami, reza ba povu Timor Leste atu bele hatene liu tan fiar, hametin igreja katolika nian, atu orienta politika hotu ba fiar igreja katolika nian neebe tradisionalmente dura iha tempu nee,” dehan nia.
Iha fatin hanesan, Nunsiatura Reprezentante Vatikanu iha Timor Leste, Mgr Marco Sprizzi dehan, iha loron hirak nia laran halo despedida barak, konferensia espiskopal mos organiza despedida boot, no mos Seminariu Balide Fatumeta Maloa halo mos despedida han hamutuk.
Iha mos Parlamentu Nasional halo mos votu despedida no votus louvor, no Prezidente Republika mos halo despedida boot ida, iha mos prezensa husi Primeiru Ministru, Prezidente Parlamentu, Prezidente Tribunal Rekursu, Ministru Embaixador no sosiedade sivil sira, furak tebes. No simu mos kondekorasaun ida, ho grau kolar Timor Leste nian, no emprezariu sira mos organiza depedida ida.
“Ba hau eventu ida ohin despedida iha misa ida nee importante tebes, laos kiik liu husi sira seluk, maibe importante tebes hau lori iha hau nia fuan no hau nia moris,” dehan Nunsiu.
Nia dehan, agradese Ministru, ho nia Diretor Madre no Padre, maluk sira hotu neebe iha fatin nee, agradese ho fuan no laran, sai hanesan maun alin inan feton atu lao hamutuk ho esperansa ba eternidade. No sei lori saudasaun ba iha Santu Padre.
(ter)
