DILI, STLTIMORLESTE.com – Direjente husi eskola no fornesedor programa merenda eskolar iha munisipiu balun seidauk halao formasaun.
Kestaun nee hatoo husi Belchior Maria Almeida Barros hanesan Xefe Departamentu Programa Merenda Eskolar iha ME ba STL, Sesta nee (31/07/2026).
“Hau hanoin konaba formasaun ba ita nian dirijente no fornesedor sira husi eskola iha munisipiu balun seidauk halao formasaun, tanba ita nian munisipiu neebe mak halao ona formasaun nee mak hanesan Munisipiu Manatutu, Dili, Aileu, Liquiça no Ermera, hirak nee mak remata ona,” nia dehan.
Nia informa, direjente husi eskola neebe tuir formasaun nee mak hanesan koordenador pre eskolar, diretor eskola ho ninia filial sira, inklui fornesedor ba implementasaun programa merenda eskolar.
Nunee mos Gabinete Apoiu Tekniku (GAT) husi EBC Manleuana, Narciso Pinto Soares Vieira da Costa dehan, ho fornesedor husi Ensinu Baziku Central (EBC) Manleuana, partisipa ona formasaun durante loron rua husi ME no WFP.
“Foin daudaun nee ami tuir formasaun, primeiru nee husi WFP, sira koalia konaba alimentasaun ai-haan sira neebe mak atu uza ba iha merenda eskolar, nunee bele hasae nutrisaun labarik sira nian, nee duni formasaun nee koalia liu konaba merenda eskolar, liu-liu ba iha ai-haan lokal sira nee, neebe mak iha ita nian rai laran, ami tuir formasaun durante loron rua. Formador neebe fo formasaun ba ami nee husi WFP hamutuk ho ME liu husi Edukasaun Dili, sira tuir formasaun durante loron rua, koalia konaba ai-haan, no menu hirak neebe mak atu prepara ba estudantes sira, nomos iha planu ba tinan oin, merenda eskolar bele lao diak liu tan,” nia esplika.
Tanba tuir nia, sira atu aplika, tanba tuir lo-loos tuir menu neebe iha, sira hakarak atu sukar ou tetu menu ezemplu etu tetu ho nia grama, inklui modo tetu ho nia grama, naan ho aifuan sira, ho nunee bele fo nutrisaun neebe diak ba estudantes sira. Depois halo pratika alimentasaun hanesan tein amostra ai-haan lokal sira nee, depois sira hatudu ai-haan lokal sira nee, depois mak sira halo pratika tein, observa haree ho matan, depois sira tetu dasin nee, tetu nee ninia grama hira, hanesan naan, aifuan sira nee, sira kompara aifuan neebe diak liu ba estudantes sira, fore mungu nee sira bandu labele halo ho susu enak.
“Hau hanoin iha formasaun nee koalia konaba menu neebe uza iha loron sesta nee nuben, gula mera, lakeru tasak, maibe iha loron hirak liu ba sira halo ida nee, estudantes balun mak han, balun lakohi han, tanba dehan ladun midar, nee duni oinsa mantein nafatin menu neebe mak iha, evita buat midar sira nee para hadok aan husi moras ran midar,” nia komenta.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, formasaun ba direjente eskola sira, liu-liu konaba oinsa mak atu implementa programa merenda eskolar iha eskola sira.
“Hau hanoin konaba formasaun ba direjente eskola sira, liu-liu konaba oinsa mak atu sira nafatin iha lina kordenasaun nee importante tebes,” nia esplika.
(jac)
