DILI, STLTIMORLESTE.com – Nunsiatura Reprezentante Vatikanu iha Timor Leste, Mgr Marco Sprizzi, selebra misa ikus hamutuk ho dadur sira iha Prizaun Bekora.
“Ohin misa dala ikus iha Timor Leste, liu tinan 6 fulan 2 hau servisu iha nee reprezentante Amu Papa nian, rai ida neebe furak tebes no agora hau husik fali Timor,” dehan Nunsiatura liu husi nia omilia, bainhira prezide misa iha Prizaun Bekora, Kuarta (05/03/2025).
Nia dehan, liu tiha Santu Padre nia vizita ba ferias tiha, no antes ida nee koalia ho Amu Kapelaun hodi selebra misa ida iha Prizaun, no konvina loron atu selebra misa hamutuk ho maluk sira iha Bekora, no buka tempu haree katak, loron Kuarta sai hanesan loron neebe selebra eukaristia hamutuk ho maluk sira nee no ikus mai selebra duni.
Nunee, la espera misa tiha iha Bekora, hela deit loron tolu sei aranka fali ba vatikanu, no la hein loron ida nee konsidera hanesan Maromak nia hakarak, halo misa iha fatin ida nee no agradese simu ho fiar.
Nunsiatura hatutan, sira neebe hela iha fatin nee importante tebes, tanba Jesus dehan iha evanjelhu, “Hau dadur imi mai vizita Hau, banhira iha loron final ita hotu-hotu liu husi julgamentu hodi simu kolen tuir hahalok sira, iha hahalok sira nee hotu, lia fuan neebe Jesus dehan, hau iha kadeia imi ba vizita Hau.
Hakarak dehan tan dala ida, laos Jesus dehan imi ba haree ema dadur sira iha kadeia, maibe Jesus dehan Hau dadur hela imi ba vizita Hau. Hanoin didiak kona-ba pontu ida nee tanba sa, Jesus dehan Hau mak dadur, tanba Nia hakarak identifika ho ita idak-idak, nee responsabilidade boot ida.
Nunsiatura hateten, hanesan Padre, Jesus identifika Nia aan iha Nia no iha Jesus, nee hanesan responsabilidade boot ida, tanba halao knaar iha Jesus nia fatin, no Jesus dehan Nia dadur hela, tanba nee Jesus iha ita idak-idak nia aan, ida nee hanesan vokasaun ida neebe ita idak-idak simu relasaun ho sira neebe iha fatin nee hanesan dadur.
Ba Guarda sira, hanoin ba iha prizoneru idak-idak nia aan nee, Jesus iha neeba, ida nee la dehan katak, la aplika regra sira no regra nee nesesariu no kumpri ba justisa no lei neebe iha, maibe komunikasaun ho dadur sira ho respeita ho domin, haree Jesus no Maromak iha idak-idak nia aan, Jesus fakar nia raan ba ita idak-idak, la iha sala ida neebe Jesus lakohi perdua.
Nunee, atu hetan perdua presiza hakribi sala, presiza husik ita nia parte idak-idak hatene nia aan katak, ita ema sala nain ita mak halo sala no hakribi sala, tanba nee molok hahu misa ita idak-idak husu perdaun ba Maromak ba ita nia sala sira, husi Nai Lulik too povu hotu, Jesus dehan, Jesus mai tanba ema sala nain sira, los tanba ema justu ema diak sira.
“Amu Papa Fransisco ba vizita dadur sira iha kadeia nia sempre hanoin, buat neebe akontese ba dadur sira, mos akontese ba Amu Papa. Ida nee ita la justifika ita defende ita nia sala, maibe ita idak-idak buka hakaas aan atu sai ema diak,” dehan nia.
(ter)
