DILI, STLTIMORLESTE.co — Timor Leste konhesidu hanesan nasaun ida ho loron feriadu barak tebe-tebes, laos natal no tinan foun deit mak ho loron feriadu naruk, maibe loron santu paskua no loron boot sira seluk sempre iha feriadu naruk no laiha atividade governu.
Governu liu husi Orsamentu Jeral Estadu (OJE) kada tinan aloka osan ho montante boot hodi selebra loron nasional sira, halo mos kalendaria ba loron feriadu nasional ho pontu toleransia ba funsionariu sira feriadu naruk no la halao servisu, mezmu loron boot sira remata ona, setor privadu sira hanesan loja, imprezas komesa halao servisu hanesan baibain, membru governu sira feriadu tanba pontu toleransia.
Hanesan akontese iha segunda (6/4/2026), loron servisu, maibe tanba iha pontu toleransia, atividade governu nian paradu, palasiu governu taka, palasiu prezidensia taka, banku sira taka, so mediku sira iha klinika no hospital sira mak kontinua servisu hodi atende sidadaun neebe moras, maibe laiha atendimentu publiku.
Tanba feriadu, eskola sira mos taka, nunee mos universidade sira laiha atividade akademiku, mesmu iha estudantes balu tama, maibe laiha aula, nunee mos hanesan iskritoriu polisia nian, postu sira laiha polisia, so iha membru polisia ida rua, iha eskuadra sira so membru polisia neebe servisu nunee komando polisia nian membru polisia neebe servisu konversa ho nia maluk. Nunee mos iha STAE Kaikoli funsionariu lubun ida mak hamrik hela iha liur, tanba laiha orden servisu iha segunda feira.
Iha segunda nee iskritoriu instituisaun governu nian kuaze taka total, iha iskritoriu sira so hetan deit kareta marka kareta estadu para hela iha areador iskritoriu nian hanesan iha ADN nian, iha Tribunal, palasiu governu no instituisaun governu sira seluk.
Kareta ho marka kareta estadu mos la hetan halo movimentu iha estrada publiku hanesan loron servisu, movimentu ba mai iha estrada publiku iha segunda nee mak kareta privadu, no motor, movimentu kareta sira iha segunda nee mos hanesan bain bain komesa segunda dadersan to meudia laiha engarafamentu.
Iha area bairopite bain bain risku ba engarafamentu segunda nee lae liu, movimentu lao hanesan bain bain no livre los, ema sira halo movimentu tanba iha interese ba nesesidade balu, tanba maioria funsionariu publiku sei deskansa tanba iha pontu toleransia.
(god)
