DILI, STLTIMORLESTE.com – Prezidente Republika (PR), Jose Ramos Horta simu aprezentasaun programa husi juventude katolika.
Prezidente Republika Jose Ramos-Horta simu audiensia husi Komisaun Nasional Juventude Katolika Timor Leste (KNJTL) lidera husi Pe. Francisco Seran neebe akumula organizasaun juventude husi Dioseze Dili Baukau no Maliana hodi aprezenta asuntu kona-ba eventu sira neebe sei realiza iha tinan 2026.
Iha biban nee Pe. Francisco Seran ba jornalista iha palasiu Prezidensial Nicolau Lobato, Bairo Pite, Segunda (18/05/2026) hatete, sente kontente hasoru malu ho Prezidente Republika hodi aprezenta asuntu kona-ba eventu sira neebe sei realiza iha tinan 2026 hanesan Asembleia Fe Jornada Nasional Juventude iha Parokia Remexiu inklui Jornada Mundial Juventude Katolika iha Koreia Sul.
Pe. Seran esplika liutan eventu kona-ba Asembleia Fe tuir planu formandu sira sei vizita Palasiu Prezidensial Nicolau Lobato no halo mos audiensia ho Prezidente Republika.
Tuirmai Jornada Nasional Juventude neebe lidera husi KNJTL nian husu atu Xefe Estadu bele partisipa no sai orador iha programa refere. Nunee mos Jornada Mundial Juventude nian ekipa KNJTL informa ba Prezidente Ramos-Horta atu hatene liuliu partisipante sira neebe sei ba.
Resposta ba asuntu sira-nee Xefe Estadu sei marka prezensa iha Asembleia Fe no Jornada Nasional Juventude iha Remexiu konforme ajenda ka planu iha fulan-agostu nee.
(eme)
