BAUKAU, STLTIMORLESTE.com – Presu kombustivel ba produtu gazolina iha Munisipiu Baukau too ona US$ 1.49 no produtu gazoel US$ 1.61 kada litru.
Diretor kompanhia postu abastesimentu Manudare Fuel, Helio Francisco esplika, relasiona presu kombustivel ba produtu gazolina no gazoel atual iha Munisipiu Baukau sae, tanba impaktu mos husi funu iha mediu oriente neebe implika ba presu kombustivel iha nasaun hotu inklui Timor Leste.
“Apartir folin mina nee sae iha dia 01 Abril nee regra presu ida nee estabelesidu automatikamente 13 munisipiu postu kombustivel rasionaliza fali tuir duni regras,” hateten Helio ba jornalista sira iha Tirilolo Baukau, Tersa (07/04/2026).
Nia sublina, postu abastesimentu sira iha Munisipiu Baukau inklui Manudare Fuel neebe daudaun aplika folin kombustivel gazolina no gazoel ba kliente sira tuir regras neebe Governu estabelese.mak hanesan presu ba produtu gazoel la liu husi US$ 1.65 kada litru no gazolina la liu US$ 1.50 kada litru.
Nia fundamenta, postu abastesimentu sira iha Munisipiu Baukau inklui Manudare Fuel daudaun nee aplika presu kombustivel ba seidauk liu regras folin husi Governu.
“Wainhira kuandu labele fo ona margin ho presu ida nee signifika preokupasaun husi operador sira sei hatoo tan fali presu neebe mak difini ona husi Estadu neebe fo sai,” Helio akresenta.
Iha sorin seluk, Xefe Suku Afasa, Joaquim Fernandes Ximenes konsidera, funu iha mediu oriente implika makaas ba presu kombustivel iha Timor.Leste neebe kustu movimentasaun komunidade sira ho transporte publiku diresaun Postu Kelikai Antigu ba Baukau Vila sae ba US$ 3.50 kada pasajeiru.
“Antes nee US$ 2.00 maibe agora daudaun mina sae makaas nee mak US$ 3.50 ba mai entaun US$ 7.00,” Joaquim informa
Autoridade Suku Afasa nee aprezenta, distansia entre Postu Kelikai Antigu ba Baukau Vila kilometru 32 no daudaun kustu movimentasaun komunidade sira nian ho transporte publiku neebe iha, hamenus ona komunidade sira nian movimentasaun ho transporte publiku husi Postu Kelikai Antigu ba Baukau Vila.
Nia sublina, bainhira kustu movimentasaun komunidade sira nian ho transporte publiku mantein nunee, sei hamate rendimentu ekonomia familia nian iha area remotas.
(tom)
