BRUXELAS, STLTIMORLESTE.com – Prezidente Repúblika (PR), José Ramos-Horta defende pás, diálogu no rekonsiliasaun nu’udar dalan atu rezolve konflitu no harii futuru komún.
Prezidente Repúblika no Laureadu Nobel ba Pás, José Ramos-Horta, hato’o diskursu iha Sesaun Plenária Daruak Asembleia Parlamentár Konjunta OACPS-UE.
Iha nia diskursu, Ramos-Horta enfatiza importánsia pás no solidariedade internasionál, hodi lembra apoiu ne’ebé Timor-Leste simu durante luta ba autodeterminasaun no independénsia.
Nia afirma katak, Parlamentu Europeu no instituisaun parlamentár sira seluk kontribui importante ba esforsu Timor-Leste nian atu hetan liberdade.
“Pás presiza aten-brani liu duké funu; rekonsiliasaun ezije forsa morál boot liu duké vingansa; diálogu la’ós konsesaun ba adversáriu maibé investimentu iha futuru komun,” dehan Ramos-Horta husi Komunikadu ne’ebé STL asesu Kuarta (11/11/2026).
Prezidente mós fahe esperiénsia Timor-Leste nian iha prosesu rekonsiliasaun nasionál no harii relasaun ho Indonézia depois independénsia.
Nia subliña katak, rekonsiliasaun la signifika haluha istória ka ignora vítima sira, maibé asegura katak jerasaun futuru la kontinua sai dadur ba konflitu pasadu.
Ramos-Horta mós apela ba solidariedade internasionál atu apoia labarik sira iha zona konflitu, família sira iha nasaun illa no joven sira iha rejiaun oioin.
Nia husu ba Asembleia Parlamentár Konjunta atu kontinua hametin ponte solidariedade no kooperasaun, hodi promove mundu ne’ebé justu, pasífiku no umanu liután.
Sesaun Plenária Daruak ne’e hala’o husi loron 9 to’o 13 Novembru 2026, ho partisipasaun deputadu sira husi Áfrika, Karibe, Pasífiku no Parlamentu Europeu.
(eme)
