DILI, STLTIMORLESTE.com – Relasiona ho roupa ba dadur sira neebe uza kleur ona, planu atu sosa foun lao hela, no sei sujeita ba iha aprovizionamentu.
“Iha hela faze balu neebe ita halo daudaun ona, sei sujeita ba iha aprovizionamentu, mas ida nee sai problema ida, sira nia ai-haan loron-loron, sira nia nesesidade loron loron sai hanesan konsep boot ida,” dehan Ministru Justisa, Sergio Hornai ba jornalista sira iha Prizaun Bekora, Kuarta nee (5/03/2025).
Nia hatutan, hanesan Ministru Justisa ho Diretor responsavel sira haree ida nee atu labele iha intorupsaun, tanba ida nee diaria, buat ida neebe liga kedan ba iha ema nia utilizasaun loron-loron.
Hatan kona-ba estatutu Guarda Prizional sira nian, Ministru dehan halo tiha ona submisaun, maibe iha intorupsaun ruma, tanba atu hamosu dekreitu lei ida tenke haree, preve tan orsamentu, labele halo tiha lejislasaun, nia orsamentu la iha.
Reforsa tan, se iha tenke iha kedan orsamentu hodi halo ezekusaun.
Iha fatin hanesan, dadur neebe lakohi fo naran hatete katak, roupa neebe sira uza kleur ona, no roupa sira nee sira uza tuir atividade neebe iha.
“Roupa sira nee ami uza tuir atividade neebe iha, no roupa sira nee ami uza kleur ona,” dehan nia.
Tuir observasaun STL nian, roupa neebe detidu sira uza la hanesan, balu uza faru metan, balu kor azul. No roupa sira nee uza dala ruma iha eventu misa no mos mai tuir julgamentu iha Tribunal sira.
(ter)
