DILI, STLTIMORLESTE.com – Sarani Katolika barak iha area Perumnas, Bairo Pite, Dili, Sesta nee tuir liturjia Paixaun Nai nian neebe aas liu ho ritual rei kruz, iha kapela Rainha da Paz.
Selebrasaun neebe hahu iha tuku 15:00 loraik nee, sem kantu entrada no sem lian instrumentu, Amu Selebrante hakat ho neineik ba altar oin hodi prosta aan ka rei rai, hodi hanoin hikas fali Jesus nia mate iha kruz.
Asaun prostra aan neebe Amu Selebrante halao ho laran metin subar oin ba rai, sai momentu neebe dada tebes atensaun sarani sira. Ida nee laos serimonia ida, maibe hanesan lian ida neebe la koalia hodi hatudu laran triste no haraik aan iha Maromak nia oin.
Amu Selebrante prostra aan durante minutu rua, iha momentu neeba sarani sira mos hakneak hodi reza iha fuan laran. Situasaun nee hatudu unidade fiar nian neebe forte tebes iha sarani ka komunidade Perumnas laran.
Hafoin Amu Selebrante hamriik, liturjia kontinua ho orasaun, selebrasaun nee lao ho ordinadu tebes, maski espasu iha kapela laran la kobre sarani sira hotu neebe tur sai too iha estrada ninin.
Iha selebrasaun liturjia nee Amu Selebrante, Daniel fo hanoin ba sarani sira katak, kruz mak sinal vitoria no domin boot Maromak nian ba umanidade.
“Ita mai iha nee laos deit tuir misa no rei kruz nuudar kostume, maibe atu hafoun fali ita nia fiar no haraik aan iha Maromak nia oin,” dehan Amu Selebrante iha ninia omilia, bainhira prezide misa Sesta Feira Santa iha Kapela Rainha da Paz, Perumnas, Bairo Pite, Dili, Sesta (03/04/2026).
Entretantu tuir observasaun jornalista STL iha fatin selebrasaun hatudu katak, sarani sira forma naruk husi altar oin too liur odamatan kapela nian hodi hein turnu ho pasiensia.
Husi labarik, foinsae too katuas ferik hotu-hotu hakat ho silensiu, hodi fo omenajen ba kruz neebe taka ho hena kor muda ka purple.
Ambiente iha kapela laran no liur sente triste, maibe nakonu ho esperansa neebe akompanha ho kantu sira husi grupu koral. Sarani balu labele augenta hodi hamonu mata been, bainhira sira hanoin kona-ba kruz, nuudar forma ida husi arrependimentu no gratidaun.
Bainhira sarani sira remata ritual rei kruz, altar neebe antes nee mamuk sei kobre fali ho hena mutin ka korporal. Madre sira lori santisimu sakramentu (hostia) neebe konsagra tiha ona, iha Kinta Feira Santa husi repositoriu hodi tau iha altar leten.
Hafoin simu tiha komuniaun sagrada selebrasaun Paixaun Nai Jesus nian remata ho orasaun hamutuk husi Amu Selebrante. Sarani sira neebe remata tiha ritual rei kruz no eukaristia nee, fila ba sira nia uma ida idak ho ambiente silensiu total. Laiha kantiku despedida nian, nuudar sinal laran triste no respeitu ba Jesus neebe mate ona, hodi hein fali selebrasaun vijilia paskua nian iha loron Sabadu kalan.
(car)
