BAUKAU, STLTIMORLESTE.com – Pesoal tekniku matan sira realiza konsulta matan no halo operasaun ba matan durante loron lima (5) iha Hospital Rejional Eduardo Ximenes (HoREX) Baukau.
Tekniku matan iha Hospital Rejional Eduardo Ximenes Baukau, Laurinda Guterres esplika, tekniku matan husi Hospital Rejional Eduardo Ximenes Baukau no Hospital Nasional Guido Valadares servisu hamutuk hodi realiza konsulta matan no halo operasaun matan ba komunidade sira iha Munisipiu Baukau neebe presiza.
Konsulta no operasaun refere hahu iha loron 02-06 Junhu no realiza iha Hospital Rejional Eduardo Ximenes Baukau tarjetu ba komunidade operasaun matan besik nain 200 kompostu moras katarata, laukoma teresium no pekista aleinde mos atende komunidade sira neebe hakarak konsulta matan.
“Tuir dadus neebe iha fokus ba operasaun nee besik 200 kazu neebe mak ita halao durante loron lima ohin sira komesa hahu iha klinik komesa operasaun ona,” hateten Laurinda Guterres ba jornalista sira iha HoREX Baukau, Segunda (02/06/2025).
Nia sublina, numeru pasiente refere afeta husi katarata kongenital, inklui idade avansadu no kauza husi trauma, tanba nee submete ba prosesu operasaun hodi mediku sira rekupera sofrementu neebe durante numeru pasiente refere infrenta.
“Pasiente sira nee idade maioria 40 ital iha labarik ida mak kongenital ita labele halo operasaun iha nee ita tenke transfere ba Dili,” nia fundamenta.
Teknikku matan nee argumenta, Hospital Rejional Eduardo Ximenes Baukau bele simu atendimentu kona-ba tratamentu matan nian hanesan fo konsulta no halo operasaun matan, maibe kona-ba operasaun matan ba labarik sira, Hospital Rejional Eduardo Ximenes Baukau labele atende, tanba labele halo anastezia razaun laiha espesialista matan atu atende labarik sira liu-liu halo operasaun matan nian.
Familia pasiente konsulta matan, Adriana Manuela Correia agradese ba oportunidade, tanba bele hetan atendimentu.
“Hau lori labarik mai atu husu Saude sira tau matan, tanba nia matan uluk moris mai nee hanesan nee ona (difisiensia matan),” hateten Adriana.
Konsulta matan no halo operasaun ba matan nee realiza durante loron lima iha Hospital Rejional Eduardo Ximenes fo oportunidade ba komunidade sira iha Munisipiu Baukau atu konsulta matan.
(tom)
