BRUXELAS, STLTIMORLESTE.com – Timor-Leste (TL) hametin relasaun ho Parlamentu Europeu, husi solidariedade durante luta independénsia ba kooperasaun nu’udar nasaun independente.
Prezidente José Ramos-Horta partisipa nu’udar konvidadu onra iha Sesaun Plenária Daruak Asembleia Parlamentár Konjunta OACPS-UE, ne’ebé hala’o iha Bruxelas, Béljika, husi loron 9 to’o 13 Novembru 2026.
Tuir komunikadu ne’ebé STL Asesu Kuarta 11/11/2026 hatete Vizita Prezidente nian iha 2026 iha signifikadu istóriku, tanba nia primeira vizita ba Parlamentu Europeu akontese iha 1992, nu’udar reprezentante povu Timor-Leste ne’ebé hela iha okupasaun.
Durante períodu ne’e, nia lori mensajen kona-ba pás, diálogu no direitu povu Timor-Leste atu determina ninia futuru rasik.
Depois masakre Santa Cruz iha 1991, Parlamentu Europeu adota rezolusaun sira ne’ebé husu responsabilizasaun no embargu armas, hodi manifesta apoiu ba povu Timor-Leste.
Iha 1999, Parlamentu Europeu fó Prémiu Sakharov ba Liberdade Hanoin ba lider Rezisténsia Timor-Leste, Kay Rala Xanana Gusmão.
Iha 2010, Ramos-Horta fila fali ba Parlamentu Europeu nu’udar Prezidente Timor-Leste independente, depois nasaun ne’e restaura ninia soberania.
Agora, iha 2026, nia prezensa reprezenta kontinuidade relasaun Timor-Leste ho Europa, husi solidariedade iha luta ba independénsia ba kooperasaun nu’udar parseiru.
Parseria OACPS-UE, ne’ebé estabelese tuir Akordu Samoa, halibur nasaun sira husi Áfrika, Karibe no Pasífiku ho Uniaun Europeia.
Asembleia Parlamentár Konjunta ne’e iha membru na’in-156, ho distribuisaun na’in-78 husi OACPS no na’in-78 husi Parlamentu Europeu.
Fórum ne’e promove diálogu polítiku, kooperasaun parlamentár no troka hanoin entre Europa no nasaun sira husi Áfrika, Karibe no Pasífiku.
(eme)
