BOBONARO, STLTIMORLESTE.com – Udan ho intensidade kiik neebe tun lorloron akompanha ho kalohan taka metin rai, hafalun mos monumentu sagradu Igreja Parokia Bobonaro. Maski udan tun la dun boot, kondisaun klima mahon naruk nee kontinua rezulta atividade sosial, no ekonomia komunidade lokal nian paradu ka trava.
Tuir observasaun jornalista STL iha terrenu, liu liu iha loron Sesta horiseik (22/05/2026) kalohan neebe tun too rai klaran hamenus ba vizaun ba transporte sira, no subar tomak didin lolon no estrutura Igreja nian husi dok. Situasaun malirin no udan been neebe tun laho para halo komunidade sira subar ka hela deit iha uma laran.
Komunidade Bobonaro, Jaime da Silva hatoo nia preokupasaun boot, tanba situasaun natural nee limitadu sira nia movimentu, atu buka moris no ba servisu fatin.
“Udan lorloron hela deit iha nee, ami mos komesa laran todan ona tanba labele sai ba buka moris ka halo servisu iha liu. Kalohan mos taka hela deit rai husi dader too kalan halo rai nakukun nafatin,” dehan Jaime ba STL, iha Igreja Pakoria Bobonaro, Sesta (22/05/2026).
Aleinde nee udan been neebe tun nafatin mos hamosu risku ba kondutor sira neebe utiliza transporte roda rua no roda haat, tanba estrada ligasaun sira besik area foho nian nakonu ho tahu.
Too notisias nee STL fo sai, kalohan no udan been neebe la dun boot nafatin taka area Bobonaro Villa. No komunidade sira husu ba parte kompetente atu nafatin tau matan fali ba kondisaun estrada neebe afetadu hodi fasikita fali transporte.
Enkuantu Igreja neebe sai sentru ba devosaun sarani nian iha Postu Administrativu Bobonaro, Munisipiu Bobonaro nee mak Igreja Parokia Nossa Senhora Imaculada da Conceição Bobonaro. Edefisiu sagradu nee kontroi liuhusi finansiamentu husi Gabinete Apoiu Sosiade Sivil, Gabinete Primeiru Ministru husi VIII Governu Konstitusional.
Obra uma Kreda nee inaugura mos husi eis Primeiru Ministru (PM), Taur Matan Ruak, no hetan bensaun husi Bispu Dioseza Maliana, iha loron 22 fulan Outubru tinan 2019 liu ba.
(car)
