DILI, STLTIMORLESTE.com – Primeiru Ministru (PM), Kay Rala Xanana Gusmão hatete, nasaun Vietnam apoiu Timor Leste (TL) iha tempu neebe krize, no tempu badak Primeiru Ministru Vietnam sei vizita TL, rai rua presiza hametin kooperasaun.
Primeiru Ministru, Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Kinta (06/03/2025).
Primeiru Ministru dehan, Vietnam amigu diak ho TL, tanba apoiu TL iha tempu neebe mak krize, no tempu besik Primeiru Ministru Vietnam sei vizita TL, tanba foin lalais Prezidente ba Vietnam enkontru kapaas, no Vietnam amigu kapaas ida, Primeiru Ministru sei mai, Primeiru Ministru sei mai neebe sei buka took saida mak bele koopera ho Vietnam no Telemor nee husi Vietnam.
“Vietnam ajuda ita tebes iha 2009, krizi mundial ai-haan, ita mos araska tebes oinsa mak hatama hahan bele ajuda ita nia povu, nee mak enkontru ho doador sira beibeik, sira dehan ami bele apoiu, husu apoiu saida sira dehan asistensia teknika, hanoin katak sira fo osan mai ita sosa foos ba povu agora dehan fali asistensia teknika lori imi nia asistensia nee ba hela ba imi nia rai, nee mak hau ba too Vietnam sira dehan sim hodi ida nee mak ita sosa tiha foos husi Vietnam, ita faan fali mais ho presu kiik nee mak iha tempu neeba ita konsege duni rezolve problema falta ai-haan nee,” dehan PM, Xanana.
Primeiru Ministru dehan, Timor Leste iha tempu difisil Vietnam mak apoiu, nunee bele rezolve problema ai-haan, enkuantu iha Filipina, Indonezia rasik no fatin seluk iha ASEAN halo manifestasaun beibeik, tanba ai-haan laiha maibe Timor Leste konsege rezolve ho problema ida nee.
“Neebe ai-haan husi Vietnam mai ita iha hela, no sira mos produs barak tebes, maibe ita mos iha hela planu husi Kamboja mos hakarak oferese fatin ba ita nia ema sira ba produs iha neeba hodi aprende produs halo nusa, problema mak ida nee sira bee barak, sira nia mota bolu Real nee bee nakonu ita nia lae? Ita nia mota rai henek mak nakonu bee mai lori tan rai henek mai estraga tiha, neebe iha problema ai-haan mos ita hela kooperasaun ho Hunan,” katak PM.
Tinan 10 estabelesimentu relasaun ho sidade Hunan oinsa mak hanorin, oinsa mak bele hasai bee, uluk nee produs tinan 1 maibe agora bele koa haree dala rua masimu dala 3 neebe Hunan ajuda hela Timor Leste iha asuntu nee.
“Iha Manatutu imi hatene, imi ba ka lae? Imi iha deit Dili, iha neeba mos sira halo kultura seluk tan iha fatin ida iha neeba kria mos animal buat sira nee hotu, neebe ita mos iha agrikultura, ita mos iha relasaun ho kooperasaun ho rai balu neebe la husu osan koopera deit nee mak kooperasaun diak liu, nee mak kooperasaun hanesan nee,” katak PM.
PM dehan, mai informa ba Prezidente katak momentu ida nee Governu halao hela workshop, PM mos ba ona Ermera no Lospalos iha Dili rasik hasoru malu ho setor privadu Timor Leste nia rasik hodi bele kurize ona saida mak sira iha tiha ona.
(eme)
