DILI, STLTIMORLESTE.com – Eis Primeiru Ministru (PM), Mari Alkatiri iha loron Segunda nee (25/05/2026) presta deklarasaun iha Ministeriu Publiku.
Eis PM nee too iha edifisiu MP iha oras tuku 9:36 ho kareta A.21.208. Akompana ho kareta Ex-PM-MA S1, neebe utiliza husi eskoltu sira.
Hafoin too iha fatin refere, eis PM hakat liu tama ba iha Gavinete Sentral Kombate Korupsaun no Krime Organizadu, hodi presta deklarasaun.
Tuir informasaun neebe iha, Eis PM presta deklarasaun iha MP, ligasaun ho prosesu balu iha RAEOA.
Eis PM Mari ba iha fatin refere, akompanha husi eskoltu sira.
Hafoin presta deklarasaun ba jornalista sira eis PM dehan, nia respeita Instituisaun Judisiariu.
“Tanba hau respeita Instituisaun Judisiariu, laos hanesan seluk kuandu bolu la mai, hau respeita Instituisaun Judisiariu nee mak hau mai,” dehan Mari ba jornalista sira iha Kolmera.
Eis PM hatutan, nia parte hakarak hametin judisiariu sai independente, balu hakarak uza. No saida mak presta iha laran nee Segredu Justisa.
“Hau sai, hau prontu imi akompanha deit, luta nee foin hahu too aban bain rua,” dehan Mari.
Konfirma konaba prontu hatan iha Tribunal ka lae, Mari hatan dehan nunka halai husi Tribunal no Ministeriu Publiku.
“Hau nunka halai husi Tribunal no Ministeriu Publiku hanesan ema balu,” dehan nia.
(ter)
