LAUTEM, STLTIMORLESTE.com – Tempu udan tasi iha area Sica, Suku Baduro, Postu Administrativu Lautem, Munisipiu Lautem okupa too estrada, iha neebe fo impaktu ba estudante sira inklui komunidade sira neebe ho transporte publiku no privadu husi Munisipiu Lautem ba Baucau no Dili.
Xefe Suku Baduro, Faustino Dias Almeida aprezenta, estrada nasional diresaun Lautem-Baucau no Dili iha area mota Sica Suku Baduro nian neebe laiha ponte durante nee la difikulta estudante sira husi area Sica Suku Baduro neebe ba eskola iha eskola ensinu baziku Lautem no fo impaktu ba estudante sira husi Lautem neebe ba eskola kolejiu Maristas iha Sica inklui transporte publiku no privadu sira diresaun husi Lautem ba Dili no fatin seluk, maibe inisiu tinan nee bainhira laloran tasi boot fo impaktu ba estudante ensinu baziku sira husi area Sica Suku Baduro neebe ba eskola iha eskola ensinu baziku Lautem nomos fo impaktu ba estudante sira husi Lautem neebe ba eskola kolejiu Maristas iha Sica, tanba pasadeira neebe estabelese iha mota Sica ho tasi kuaze nia tetuk hanesan, iha neebe bainhira laloran tasi boot no aumenta udan, tasi nia volume liu pasadeira iha mota refere obrigado estudante sira tenke lakon materia prosesu aprendizajen iha eskola.
“Agora bele dehan fulan rua ona se tasi boot labarik sira labele liu ba Lautem no eskola ida kolejiu Maristas iha leten mos sira labele ba tanba afeta ba mota ida nee, tanba tasi boot tasi taka hotu dalan nee ita ema labele liu,” Xefe Suku Baduro, Faustino Dias Almeida hateten ba STL iha mota Sica Lautem, Sabadu (23/05/2026).
Nia konta, husi tinan 2025 ba kotuk movimentu liu husi pasadeira iha mota refere diak, tanba pasadeira neebe estabelese iha mota refere aas husi tasi, iha neebe tempu udan estudante sira no transporte publiku sira bele lao ba mai, maibe iha inisiu tinan nee kauza husi udan boot no tasi boot implika pasadeira iha mota refere ho tasi nia tetuk kuaze hanesan, iha neebe bainhira tasi boot no mota tun no tasi boot estudante sira labele ba eskola, tanba tauk balada protejidu hanesan Lafaek iha area refere.
Enkuantu transporte publiku hanesan bus no seluk tan diresaun Lautem-Dili no seluk tan, obrigadu tenke luku tasi liu husi pasadeira iha mota refere neebe okupa husi tasi.
“Ami nia preokupasaun primeiru hadia emerjensia para labarik sira bele lao ba mai, tanba iha nee avo sira lao ba mai nee mak labarik sira tauk atu liu,” Faustino Dias Almeida espresa.
Kondisaun nee Autoridade Suku Baduro preokupa, tanba neebe liu husi Autoridade Postu no Munisipiu dirijiona ona ba Ministeriu Obras Publikas atu kontrui ponte iha area refere, nunee estudante no komunidade sira neebe ho transporte publiku no privadu bele movimentu bele halao movimentasaun livre.
Iha fatin hanesan estudante sestu anu Leonizia Jelora Almeida bainhira fila husi eskola iha Lautem ho kolega sira atu fila ba uma iha mota Sica espresa sentimentu triste, tanba mota Sica laiha ponte iha neebe tempu udan laloran tasi boot obrigado estudante sira neebe ho transporte hanesan motor eletriku no lao ain labele ba eskola, tanba tauk balada protejidu hanesan Lafaek.
“Ami husi Sica ba eskola iha Lautem, mota tun ami la ba tanba avo iha, se mota tun ami la ba karik durante semana ida udan nee ami la ba,” Jelora hatete.
Estudante nee espresa, bainhira udan boot too semana difikulta estudante sira husi Sica ba tuir prosesu aprendizajem iha eskola Lautem, tanba tasi okupa liu pasadeira iha mota refere neebe iha balada protejidu hanesan Lafaek. Nunee durante udan boot no laloran tasi boot estudante sira iha Sica lakon materia prosesu aprendizajen.
Tanba nee Jelora husu Governu liu husi Ministeriu Obras Publikas atu kontrui ponte iha area refere.
Entretantu too notisia nee publika, STL seidauk hetan konfirmasaun husi Diretor Servisu Munisipal Obras Publikas Lautem.
(tom)
